-Almmuhus-
OIDNON JA GULLONVárut vai eai gease 50 proseantta vearu bálkkás

Várut vai eai gease 50 proseantta vearu bálkkás

-

-

Leat go muitán friijakoartta dahje vearrokoartta geassebarggu oktavuođas?, jearrá Vearroetáhtta.

Jus vuorddát ahte dinet eambbo go 65 000 ruvnno jagis, de lea veara diŋgot vearrokoartta. Jus it, de gesso 50 proseantta vearru 65 000 ruvnnos, dieđiha Vearroetáhtta.

– Olu nuorat vásihit iežaset vuosttaš bargoeallima geasset, ja de lea dehálaš ahte leat ožžon friijakoartta dahje vearrokoartta, lohká Vearroetáhta divišuvdnadirektevra Marta Johanne Gjengedal preassadieđáhusas.

Go ášši lea nu ahte bargoaddi lea geatnegahtton geassit 50 proseantta vearu du bálkkás jus dus ii leat friijakoarta. Jus dus lea friijakoarta, muhto dinet friijakoartaráji badjel, mii lea 65 000 ruvnno, de gesso 50 proseantta vearru. 

– Jus gesso beare olu vearru jagis, de oaččut vearu buorrin, muhto easka go vearrorehketdoallu lea gárvánan 2023:s, čilge Gjengedal. 

Friijakoarta

Friijakoarta lea vearrokoarta mii duođašta ahte bargoaddi ii galgga geassit vearu du bálkkás. Dus sáhttá friijakoarta jus dinet 65 000 ruvnno, dahje unnit, ovtta jagis. 

Dan jagis go deavddát 13, de oaččut automáhtalaččat friijakoartta jus dinejit vuollel 65 000 ruvnno jagi ovdal. 

Dán jagi leat 390 000 gaskal 13- ja 18-jahkásaččat ožžon friijakoartta. Nu ahte jus galggat bargat, de lea aŋkke dehálaš ahte geahčat ahte leat ožžon friijakoartta dahje vearrokoartta, dieđiha Vearroetáhtta.

-Almmuhus-