-Almmuhus-
OĐĐASATVárut čalmmiid ja liikki beassážiid áigge

Várut čalmmiid ja liikki beassážiid áigge

-

-

Sii geat áigot olgun leat beassážiid, ávžžuhuvvojit bures vuoidat liikki ja geavahit čalbmesujiid.

Vaikko beassážat leat árabut dán jagi, ja beaivváš ii leat vuos nu badjin almmis, de sáhttá vilges muohta dahkat beaivváža suonjardeami garasin. Sihke čalmmit ja liiki leat hearkkit, várrejit Meteorologalaš Instituhtta, Stáda suonjardanbearráigeahčču, Norgga áibmodutkama instituhtta ja Borasdávdasearvi oktasaš ávžžuhusain.

Liiki ii leat nu bures hárjánan beaivesuotnjariidda ja sáhttá jođánit ruvssodit, mii dahká ahte borasdávdavárra lassána.

– Vaikko leat sealggát beaivvážii, de suotnjarastá dan dihte du ámadadjui. Dasa lassin suotnjarastá ruovttoluotta muohttagis. Dalle leat sihke čalmmit ja šovkes liiki hearkkit, lohká suonjardanbearráigeahču dutki Terje Christensen.

 

Suddon čalmmit

Čalmmit dárbbašit buori suoji. Čalmmit sáhttet suddot go leat olgun šearádagas.

Váttut eai dovdo ovdal go lea gollan 6-12 diimmu maŋŋel go lea olgun leamaš. De orru dovdome dego livččii sádduid ožžon čalmmiide, gatnjalat golget ja bávččaga geahččat čuovgga guvlui. Muhtimiin lea maid oaidnu seađas ja čalmmit bávččagit.

– Geavat čalbmesujiid mat heivejit hámi mielde dutnje, ja mat suddjejit UV-suonjardeami gilggain maid. Buot čalbmesujiin galget leat CE-mearkkat mat muitalit ahte dat leat dohkkehuvvon čalbmesuojit, lohká Christensen.

 

Liikeborasdávda

Ollugat vulget maid lieggariikii beassážiid. De ii ávžžuhuvvo njaŋgát diibmoviissaid vuojadanbáikkis, ávžžuha Borasdávdasearvi.

– Váldde dávjá bottu go beaivváš goardá buot eanemusat ja muitte doarvái vuoidasa vuoidat. Dat guoská buohkaide geat liikojit beaivvádagas goarddašit, sihke vuorraset ja nuorat olbmuide, lohká Borasdávddasearvvi váldočálli Anne Lise Ryel.

Liiki ii vajáldahte ahte dat lei bearehaga ruvssodan beaivváža dihte, ja čohkke daid vahágiid oktii, mii fas sáhttá gártat borasdávdan.

Norga lea dat riika máilmmis gos eanemus leavvá liikeborasdávda.

(©NTB)

-Almmuhus-