Geaidnojohtolatguovddáš váruha várálaš dilálašvuođaid go biebmoeallit bahkkejit luottaid ala ja tuneallaid sisa čoaskudan dihte.
– Geassebáhkat leat ollen davás, ja Geaidnojohtolatguovddáš oažžu goasii beaivválaččat dieđuid ahte eallit johtet luottaid mielde. Muhtumin bahkkejit tuneallaid sisa čoaskudit. Dat dagahit várálaš dilálašvuođaid, earenoamážit tuneallaid siste ja olggobealde, dadjá Davvi Geaidnojohtolatguovddáža fágajoavkojođiheaddji, Håvard Langmo, preassadieđáhusas.
– Leage áicil ja vuolit leahtu!
Dan ahte eallit bahkkejit luottaid ala geasset lea oahpis hástalus olu sajiin Davvi-Norggas. Maŋimuš beivviid leat boahtán olu dieđut elliid birra mat leat luottain ja tuneallain E6-luottas lulábealde Álttá, earenoamážit Storvikatuneallas, Áilegastuneallas ja Melsviktuneallas. Leat maid leamaš olu sávzzat E6-luotta alde lulábealde Troforsa.
– Mii hásttuhit johtaleddjiid leat áicilin, earenoamážit guovlluin gos lea galbejuvvon ahte sáhttet leat biebmoeallit ja meahcceeallit. Ii leat álo seamma álki oaidnit elliid mat guhtot luoddaguoras, ja danne lea jierpmálaš vuolidit leahtu, dadjá Langmo preassadieđáhusas.
Dieđit politiijai dahje eaiggádii
Olu eallit jápmet luoddagurrii. Johtaleddjiin lea geatnegasvuohta veahkehit elliid mat albmosii leat hávváduvvon dahje dárbbašit veahki. Jus lea sáhka biebmoeallis dahje fuođđus, itge sáhte veahkehit, de galggat dieđihit eaiggádii dahje politiijai.
Geatnegasvuohta veahkehit hávváduvvon elliid lea láhkavuođđuduvvon geaidnojohtolatlágas ja elliidčálgolágas.
