Kárášjoga gielddastivrra mearridii ovttajienalaččat ahte dat guokte millijovnna kruvnna maid ráđđehus lea juolludan Kárášjoga nuoraide geat vásihedje Utøya-terrora 2011 veahkeheapmái, galget mannat nuoraid čuovvoleapmái dárbbu mielde.
Kárášjoga gielddastivrra mearridii ovttajienalaččat ahte dat guokte millijovnna kruvnna maid ráđđehus lea juolludan Kárášjoga nuoraide geat vásihedje Utøya-terrora 2011 veahkeheapmái, galget mannat nuoraid čuovvoleapmái dárbbu mielde.
Kárášjoga gielda lea 2011 rájes ožžon oktiibuot 2.55 millijovnna kruvnna stáhtas veahkehit nuoraid geat vásihedje Utøya-sullos terrora. Gielda lea dušše 417.000 kruvnna geavahan nuoraid veahkeheapmái, duođašta dárkkistanlávdegotti raportta, iige 2.55 millijovnna kruvnna nu maid ráđđealbmá raporta čájehii.
Duorastaga, čakčamánu 24. beaivvi, mearridii 2011-2015 áigodaga gielddastivra maŋimuš gielddastivrras 2015 bušeahtamudden áššis ahte guokte millijovnna kruvnna galget mannat fondii dáid Kárášjoga nuoraid čuovvoleapmái.
– Dehálaš doarjut
– Lea njulgestaga dovddahat man dehálaš lea doarjut ja viidásabbot fievrredit dán ášši nu mo galggašii ja galgá. Leamaš hui olu cuiggodeapmi dán áššis go Kárášjoga gielda lea boasttu láhkai meannudan ášši. Dan liibba geavahii dát gielddastivra bušeahta muddemis ahte dát ruhta biddjo ja vuoruhuvvo daid doaimmaide masa juolluduvvon ruhta lea, lohká Sáme Álbmotbellodaga (SáB) áirras, John Nystad.
Son deattuha ahte Kárášjoga gielddastivra doarjjui dán evttohusa ovttajienalaččat nu ahte Kárášjoga gielddastivra oinnii dárbbu ahte galggai vuoruhuvvot gosa juolluduvvon lea juo.
Njuolgolinjá politihkkáriidda
John Nystad evttohii maid ahte gulahallan gaskal gieldda hálddahusa ja gieldda politihkkáriid gaskkas galgá buorránit. Čilge nu mo son lea ádden ášši, de eai diehtán politihkkárat Kárášjogas dáid ruđaid birra ovdalgo beaggigođii medias. NRK prográmma «Brennpunkt» lei háleštan eará gielddaid hálddahusain ja politihkkáriiguin, muhto dušše hálddahusain Kárášjogas.
– Mun fertejin geavahit dan liibba. Bealistan lea hui dehálaš ahte hálddahus ja politihkkárat dihtet mii dat geavvá ja ahte hálddahus ii lállá menddo guhkká dieđuid alde ovdalgo dat juogadit daid dieđuid earáiguin. Mu dáhttu lea ahte dieđut mannet goappašiid guvlui nu johtilit go vejolaš.
Dárbbašmeahttun
Bargiidbellodaga áirras ja várresátnejođiheaddji Solveig Boine Nikkinen mielas lei dárbbašmeahttun mearrádus. Son čilge ahte gielddastivra tiŋgui dárkkistanlávdegottis raportta sáhttet go duođaštit ahte ruđat leat mannan nu mo Kárášjoga ráđđealmmái čállá raporttastis.
– Dat raporta ii leat velá boahtán min beavdái, earret dan maid logan medias govas. Danin orru mu mielas nu ártet ahte mii dál áigut váldit daid ruđaid dan foanddas. Ođđa gielddastivra gal oažžu dan raportta ja dalle ain lea ruđat dan foanddas. Mu mielas lea dárbbašmeahttun go midjiide ii leat velá raporta boahtán. Mun dorjon John Nystad go mu mielas lea unohas lohkat ahte mii eat doarjjo ja čuovvul nuoraid. Dat lea heahpat, lohká Solveig Boine Nikkinen (Bb).
