Ronny Lukkari ja Leif Bruland váldiba juohke jagi golbma vahku luomu barggus vai beassaba veahkehit vuodjit láhttuid Finnmarksløpet beanagilvvuide, nu soai dahkaba boahtte jagáš Finnmarksløpet beanagilvvuin maid.
Sirbmálaš Ronny Lukkari lea vuodján gávcci jagi láhttuid Finnmarksløpet beanagilvvuide ja son lea láhttovuodjima oktavuođas beassan jávrriin oaggut maidda son ovdal dušše beasai niegadit vuolgit.
– Lea hui buorre vuohki veahkehit vuodjit láhttuid ja seammás beasan bisánit oaggut jávrriin gos muđui in livčče beassan vuodjit, lohká Ronny Lukkari, gii váldá permišuvnna barggus Romssas vai beassá boahtit ruoktot Sirbmái vuodjit láhttuid beanavuddjiide.
– Mun válddán golbma vahku friddja barggus vai beasan leat dás mielde. Mus lea leamašan hui šiegas bargoaddi go addá munnje permišuvnna. Mu mielas lea dehálaš veahkehit ja lea somá oaidnit go ná olu olbmot čoahkkanit deike Sirbmái, lohká Lukkari.
Báhcán muitui
Okta vásáhus man Lukkari muitá bures lea go okta beanavuoddji fálai sin váldit fárrui go ledje darvánan várrái.
– Dan maid mun muittán hui bures lei go áltálaš Roger Dahl bođii fáhkka, huikkihii ja jearai «gánddat, áigubehtet go háiket mu fárrui». Mii leimmet darvánan skuteriin eat ge beassan eat gosa ge. Dan gal muittán hui bures go beanavuoddji bođii dasa ja áiggui váldit min fárrui, mii lei hui erenomáš, lohká son.
Jáhkkemeahttun maid nákcejit
Son lohká leat somán oahpásmuvvat beanavuddjiin ja son lohká leat jáhkkemeahttumin maid sii nákcejit bargat.
– Lea somá oahpásmuvvat beanavuddjiin ja guldalit sin historjjáid, seamma lea somá oaidnit man olu sii rahčet váriid badjel ja duođai nákcejit joavdat Álttás Girkonjárgii ja Girkonjárggas fas Áltái mollii. Dat gal lea áibbas jáhkkemeahttun go lea nu guhkki. Oažžu smiehttat jus Romssas vuoddjá biillain dohko Girkonjárgii ja doalaha 20 kilomehtera diimmus, de gal jallu ovdal go olle Supmii.
Vuodján 200 miilla Sirbmái veahkehit
Leif Bruland lea vuodján 200 miilla Sirbmái Sjåkas Opplánddas vai beassá veahkehit iežas fulkkiid Sirpmá bisánanbáikkis.
Leaba Magnus Varsi ja Máret Bruland Varsi geat leaba doaimmahan Finnmarksløpet Sirpmá bisánanbáikki 2004 rájes.
Son lohká dál leat njealját jahki go lea Sirpmás veahkeheamen.
– Mus lea alddán beroštupmi beatnagiidda ja Máret, gii orru dás, lea mu siessá. Mun geavahan golbma vahku iežan luomus boahtit deike veahkehit Ronny, Máreha ja Magnusa Sirpmá bisánanbáikkis. Lean váldán iežan beatnagiid maid mielde ja lean vuodján 200 miilla deike vai beasan veahkehit, dadjá son.
Vuosttaš háve dálkkiid čađa
Son lea vuodján láhttuid Finnmarksløpet beanagilvvuide ja lohká leamašan gelddolažžan beassat vuodjit čađa garra dálkkiid.
– Lea somá beassat vuodjit láhttuid, muhto leat maiddái hástalusat erenomážit dál go leat leamašan dákkár garra dálkkit. Lei gelddolaš vuodjit go olmmoš ii oainne dihkás dihkkái, dalle ferte konsentreret čuovvut GPS-rusttega ja mo siivu lea, dalle váibá oaivi go ferte nákcet dan dahkat. Lea vuosttaš háve go lean vásihan ahte lea leamaš ná garra dálki. Mii leimmet golbma láhttovuoddji ja mii doaimmaimet bures ovttas ja dalle ii lean mihkkige heđiid, lohká Leif Bruland.
