Gádjunveahka lea dál jođus helikopteriin báikái mii lea vihtta miilla nuorttabealde Guovdageainnu, gos várohit olbmo vuodján suddái ja heavvanan.
Politiijaide lea mannan diehtu ahte skuterluodda vuhtto manname suddái muhtun jogas. Oarje-Finnmárkku duođaštedje odne eahkes logi áigge Nordlys aviisii ahte báikái leat jođus veahkkeveahka. Diibmu badjel 23:00 odne muitala Oarje-Finnmárkku operašunjođiheaddji Lars Jørgen ahte Lufttransport AS lea jođus Guovdageidnui gos galget viežžat politiijaid.
– Sea-King gádjun helikopter ii lean ola muttos, go dat lea eará veahkemátkkis Barentsábis. Danne šattaimet bivdit veahki priváhta fitnodagas, muitala Kleven Ávvirii.
Siidaguoimmi ohcalan
Lars Jørgen Kleven duođašta ahte boazodoallit leat dieđihan luotta mii manná suddái, ja sii váljahit ovtta siidaguoimmi. NRK Sámi dieđuid mielde lea dáhpáhus geavvan Ahkkanasjogas. Dán duođašta Kleven Ávvirii.
– Mii dieđus eat sáhte duođaštit ahte olmmoš lea heavvanan vaikke dan várohat, dadjá Kleven. Son ii loga vuosttaš vuorus sáddet bukčiid báikái.
– Das lea sáhka ahte olmmoš sáhttá jogas, ja dál lea juo idja, ii ge bukčiin leat lohpi buokčat seavdnjadin. Dasa lassin lea oalle buolaš, dadjá Lars Jørgen Kleven. Ihttin lohká son báikái mannát bukčiid maiddái.
Kleven muitala viidásat ahte boazodoallit dihtet gean birra lea sáhka, ja sii leat ge maid dieđihan dáhpámusa mii sáhttá leat heavvananlihkohisvuohta. Guovllus lea barta man lahka lea johka masa várohit doddjon olbmo.
– Muhto eat dieđe vel áibbas sihkkarit ahte olmmoš lea doddjon johkii, deattuha Kleven loahpas.
Ávvir čuovvola ášši.
