Sotnabeaivvi eahkeda diibmu 21.36 ožžo politiijat dieđu ahte muhtin vuoras almmái várohuvvo heavvanan Guovdageainnu etnui.
Heammogietti lahkosis Guovdageainnu suohkanis várohit politiijat olbmo heavvanan go almmái galgá vuodján skuterin, ja doddjon rašes jieŋa alde Guovdageainnu eanu alde.
Almmái gii lea dieđihuvvon jávkan lea vuoras dievdu, badjelaš 80-jahkásaš.
– Son gii dieđihii lihkohisvuođa birra lei humadan albmáin gaskal diibmu 14 ja 15 otne. Dál leat ambulánsa bargit báikkis ja sii oidnet skuterluottaid mat mannet suddái eanus, muitala politiijaid operašuvdna jođiheaddji Bjørn Tormod Syversen.
Politiijat jođus
Politiijat sihke Álttás ja Guovdageainnus leat jođus Heammogieddái gos lihkohisvuohta galgá dáhpáhuvvan. Syversen muitala ahte dál vuos leat dušše ambulánsabargit doppe.
– Mii leat báikkis hui fargga guvttiin patruljain, ja fargga leat buokčaleaddjit maid doppe. Mis ii leat fanas mielde, vástida Syversen go Ávvir jearrá lea go fanas mielde.
– Ballábehttet go ahte olmmoš sáhttá heavvanan?
– Juo, dat sáhttá dáhpáhuvvan, dadjá Syversen geas eai leat vuos eambbo dieđut dáhpáhusa birra.
