Politiijat várohit guokte nuorra nieidda rievidan ruđaid muhtin kioskas Álttás. Sudnos lei sihke bissu ja niibi, ja báhčaleigga kioskas.
Politiijat várohit guokte nuorra nieidda rievidan ruđaid muhtin kioskas Álttás. Sudnos lei sihke bissu ja niibi, ja báhčaleigga kioskas.
Dán dieđiha Altaposten.
– Orru leamen luovosrukta mii geavahuvvui báhčimis. Čilgehusaid vuođul ja láhttemat čájehit ahte vearredahkkit leaba nuorra nieiddat, dieđiha Finnmárkku politiijaguovlu.
Sihtet cavgilit
Guokte olbmo, geat leigga čiehkan ámadajuid, bođiiga kioskii sotnabeaivvi diibmu 21.30 ja bággiiga addit ruđaid ja gálvvuid.
– Álttá politiijat atnet dáhpáhusa duođalažžan ja bivdet buohkaid muitalit sidjiide jus leat oaidnán maidege mii sáhttá áššái guoskat, muitala Finnmárkku politiijaguovllu operašuvdnajođiheaddji Gunnar Øvergaard NRKi.
Suorganan bargi
Kioska beaivválaš jođiheaddji, Anna Riebelova, dieđuid mielde ii leat sáhka stuora dávviriin.
– Mis lea dropsafe eai ge leat ollugat geat geavahit reaidaruđaid dál, nu ahte ii leat sáhka stuora supmis, muitala Riebelova, ja lohká ahte bargi, gii lei barggus sotnabeaivve eahkeda, lei suorganan, muhto oažžu čuovvoleami maŋŋel dáhpáhusa.
Politiijat leat čilgen suolaguoktá hámi ná:
Vearredahkki 1: birrasii 1,60 mehtera allat, ránes/čáhppes gahperbáidi mas lea logo gurut bealde ratti, čuvges ránes viehkanbuvssat, čáhppes skuovat (Uggs lágan) ja čáhppes suorbmafáhcat.
Vearredahkki 2: sullii 1,70 mehtera allat, vilges/čuvges ránes gahperbáidi mas lea logo miehtá ratti, stuora čáhppes bustávat. Ránes viehkanbuvssat, vilges skuovat, ja čáhppes suorbmafáhcat.
(©NTB)
