Sámediggepresideanta Aili Keskitalo (NSR) rabai Várdobáikki ođđa vistti lávvardaga.
Guovvamánu 1. beaivvi ávvudedje ja rahpe Várdobáikki sámi guovddáža ođđa vistti Skániin. Sámediggepresideanta Aili Keskitalo (NSR) oasálasttii doaluin. Sártnistis deattuhii presideanta mo sámi guovddáš lea áŋgiruššan earenoamážit mearrasámi ja márkosámi kultuvrra suodjalemiin ja ovddidemiin dán guovllus, ja leamaš mielde nanneme sámi identitehta.
– Sámedikki bealis sávvat lihkku beivviin ja ain viidáseappot, čállá Sámediggi iežaset Facebook siiddus.
Sisafárrenskeaŋka
Sámediggepresideanta buvttii dáiddadahkosa «VinterCamp 1» sisafárrenskeaŋkan. Dáidaga lea sámi dáiddár Hjalmar Johnsen dahkan.
