Duorastaga lei oalle oainnáhus Kárášjoga alde, go muhtin boazu lei gártan baldu ala. GEAHČA VIDEO:
Finnmárkku politiijaguovllu nuorttabeale operašunjođiheaddji Tor Inge Bjørsvik muitala iežaset ožžon dieđu bohcco birra árat odne.
– Mii leat dieđihan buollinčáskadeddjiide, ja sii dat barget viidásat dáinna áššiin, mun in dieđe mii dáhpáhuvvá viidáseappot, muitala son.
Fuomášii ja filbmestii
Tone Nordsletta fuomášii bohcco govddodeamen ja filbmestii dan. Boazu lei dalle Mánnevárnjárgga buohta govddodeamen.
– Mun hirpmáhuvven ja fertejin filbmet lohká son.
Bajimusas beasat ge oaidnit filmmaža man Nordsletta lea filbmen.
Dieđihii politiijaide
Reidun Rasmussen guhte orru Mánnevárnjárggas Kárášjogas, dat álggos fuomášii bohcco birrasiid diibmu 13.00 odne, ja dieđihii dan birra politiijaide:
– Mu mielas lea buot heakkain seamma olu árvu ja ballen bohcco heavvanit jus dan eai gájo, nu ahte riŋgejin politiijaide geat de mearridedje gohččut buollinčaskadeddjiid báikái.
Rasmussen muitala ádjánan birrasiid kvártta dahje guoktelot minuvtta das rájes go dieđihii, dassážii go buollinčáskadeaddjit jovde.
Dás oainnát mo ožžo bohcco gáddái (ođasmahte siiddu jus ii iđe):
Máŋgii doddjui
Rasmussen muitala ahte buollinčaskadeddjii lei erenoamáš fanas mielde man geavahit go rašes jieŋaid ala galget mannat.
– Dat manne golmmas dáinna fatnasiin, fatnasii ledje čadnan bátti mainna dat geat báhce gáddái, galge gaikut fatnasa gáddái loahpas, muitala nisu.
Boazu ballagođii go olbmot láhkonedje:
– Dat máŋgii doddjui jieŋa čađa, ja nu dahke buollinčáskadeaddjit maid, muhto sis lei fanas masa sáhtte dollestit. Go ledje dies bargamin de bođii eará baldu, mii lei stuoris dego girdistriipa, ja boazu ieš vulggii dan guvlui, čilge son.
Buollinčáskadeaddjit de čuvvo bohcco dan stuorát balddu ala.
– Ja de gal bohte vácci gáddái, sihke buollinčáskadeaddjit ja boazu, muitala Rasmussen guhte lea ilus go manai nie bures.
Reidun Rasmussen dattege ii loga dáhpáhusa vásihan dramatihkkalažžan.
– Buollinčáskadeaddjit gal orro bures diehtemin maid barget, eai dáidde vuosttaš geardde leamaš dákkár barggus, lohká son.
(Ášši joatká gova vuolábealde)
Priváhtagovva: Reidun Rasmussen
– Luittiimet mannat
Kárášjoga buollinveagahoavda, Nils Asllat Kildedam, duođašta fearána leamaš nie mo Reidun Rasmussen čilge badjelis.
Son muitala iežaset luoitán bohcco.
– Mii eat fáhten dalle ovttage ságaide gii lei sáhttit dovdat dan mearkka, nu ahte mii luittiimet dan bohcco ja dat lea dál doppe Mánnevárnjárgga guovllus. Dál gal diehtit sullii geaidda dat gullá dat boazu, muhto eat leat dieđihan eaiggádiidda, muitala Kildedam.
Ii Kildedam, guhte lei ieš okta dan golbmásis geat manne baldu ala, ge loga dáhpáhusa leamašan issorassan:
– Ii lean issoras go mis han gal leat buorit rusttegat. Ii ge leat vuosttaš geardde go leat šaddan bohcco gádjut jogas, muhto dalle lei skábma, muitala son.
