NRK Sápmi álggaha borgemánu 24. beaivvi ođđa nuoraidprográmma – «Valvi». Dat lea visuála rádioprográmma nuoraide davvisámegillii.
– «Valvi» lea NRK Sámi beaivválaš njuolggorádiosátta, mas guoimmuhat Norgga-, Ruoŧa ja Suoma nuorra sápmelaččaid ja fállat áigeguovdilis ságaid. Valvi lea lávdi, mas mii nannet gulahallama iežamet gehččiiguin ja guldaleddjiiguin, dadjá álgi prográmmaredaktevra Carl-Gøran Larsson preassadieđáhusas.
Dán lávddi nammii ozai NRK Sápmi mannan geasi 18–30-jahkásaš, hállás, sosiálalaš ja sáhkkes journalistaurbbiid. Dál lea virgáibidjamat dahkkon, ja dat, geat šaddet «Valvvi» profiilan leat Dávvet Bruun-Solbakk (25), Ivan Aleksander Buljo (22) ja Isalill Simonsen Kolpus (30).
– Mun iluin dieđihan ahte dát golbma ealjáris ja hutkkálaš nuora álget min lusa bargui, dadjá Larsson.
Geassebarggus
– Isalill ja Dávvet leaba mis leamaš geassebargin dán geasi ja jođihan «Geasseihána» rádios. Mii hástaleimmet «Geasseihána» geahččaladdat ođđa vugiid mo min ođđa fálaldat sáhttá lágiduvvot. Lean ilus go ohce prográmmajođiheaddjin «Valvái», ja jáhkán ahte Ivan, Isalill ja Dávvet ovttas hárjánan buvttadeddjiin Elle Gaup-Johanseniin čohkkejit nuorra sápmelaččaid oktii, lasiha Carl-Gøran Larsson.
Váldoprográmmajođiheaddjit
Prošeaktajođiheaddjis Ravna Nystadas lea leamaš ovddasvástádus ovdánahttit «Valvvi».
– Valvi-prográmmain mii áigut olahit 17-jahkásaččaid ja leat sin «joavkun». Mii sávvat nuoraid dovdagoahtit iežaset gullat dasa, ja ahte das gávdnet áigeguovdilis dieđuid ja ságaid, main maid lea himáhaddanmunni. Guldaleaddjit ja geahččit besset oahpásmuvvat prográmmajođiheddjiide ja rávásmuvvat singuin ovttas , dadjá Nystad.
Ovttas produseanttain ja «kapteainnain» Elle Gaup-Johanseniin ráhkadit Isalill, Ivan ja Dávvet sisdoalu rádioi, visuála sáddagiidda, neahttavideoide ja sosiála mediaide ja dasa lassin duddjojit buori gulahallama guldaleddjiiguin. Dávvet ja Ivan šaddaba váldoprográmmajođiheaddjin, ja Isalilla váldoovddasvástádus lea hukset gulahallama prográmma ja guldaleddjiid gaskii sosiála mediain.
«Valvvi» bargiid birra:
Ivan Aleksander Buljo lea ovdal bargan NRK Sámis. Son lágidii earret eará Sámi álbmotbeaisáddaga, son lea jođihan NRK Sámi Youtube-kanála, ja lea leamaš mielde Studio Sámis.
Isalill Simonsen Kolpus lea lektor ja lea bargan ojoatkkaskuvlla ahpaheaddjin, ja nu dovdáge bures ulbmiljoavkku.
Dávvet Bruun-Solbakkas lea stuorra servvodatberoštupmi earret eará organisašuvdnabargguid oktavuođas. Son lea maid doaimmahan rogganbargguid ja eará oanehisáigge bargguid NRK Sámis.
Elle Gaup-Johansen lea hárjánan journalista. Son lea bargan sihke kultur-, mánáid- ja nuoraidsisdoaluiguin, ja lea bargan prográmmajođiheaddjin sihke TV:s ja rádios.
