Kárášjoga nieidda Biret Rávdná Rognerud Eira dokumentárafilbma «Vihtta vahkku vieljain» lea válljejuvvon čájehuvvot Norgga Dokumentárafilbmafestiválas, dahje «Dokfilm», Voldas loahpas dán mánu.
Kárášjoga nieidda Biret Rávdná Rognerud Eira dokumentárafilbma «Vihtta vahkku vieljain» lea válljejuvvon čájehuvvot Norgga Dokumentárafilbmafestiválas, dahje «Dokfilm», Voldas loahpas dán mánu.
– Diehtu ahte lean válljejuvvon Dokfilmii mielde, bođii hui buori áiggis, go ledjen álgán smiehttat galggan go joatkit filmmaid dahkat. Lei dego duođaštus munnje ahte lean riekta bargan, ja hui somá ja lea gudni maid, go dieđán ahte lea Norgga stuorámus dokumentárafilbmafestivála mas lea hui alla dássi filmmain, lohká Biret Rávdná Rognerud Eira.
Vuosttaš filbma
Eira lea váldán bacheloroahpu mediabuvttadeamis Romssa universitehtas, ja su filbma leage boađus su loahppabarggus go gearggai mannan jagi. Dat lea su vuosttaš filbma, ja son leage hui rámis go filbma lea válljejuvvon «Dokfilm» festiválas čájehuvvot.
Ođđa áigi boazodoalus
Filbma lea dan birra go lea čuvodan iežas vielja, Nils Máhte, vihtta vahkku boazodilis. Eira muitala son lei álgán dovdat iežas gáidagoahtán eret boazodilis, go lea nu rievdan dan rájes go ieš lávii mánnán fárus.
– Filmmas govviduvvo go áigi rievdá boazodoalus, ja mu viellja eanet álgá váldet badjelasas doalu ja ovtta láhkai šaddagoahtá son siiddaisidin. Boazodoallu lea maid ollu effektiviserejuvvon ođđa bargovugiiguin, nu movt suinniiguin biebmat ja guorbmebiillaiguin johtit. Munnje lei hui ártet go lean aivve hárjánan boares málliid mielde, ja ahte min áhčči lea álo leamaš hoavdan siiddas, muhto dat lea buolvamolsun, muitala Biret Rávdná.
– Váttis ráhkadit dákkár filmma
Eira muitala ahte lea leamaš váttis ráhkadit filmma, go iežas bearaš ja lagamuččaid galgá filbmet ja jearahallat.
– Vieljas ja áhčis ledje dieđusge gažaldagat maid mun áigon govvet ja čájehit, ja fertiiga hárjánit ahte lean das olles áigge dainna kámerain. Nu movt gárddis bargguid siste, eaba sáhttán mus bivdit veahki, go mus lei čađat dat stuora kámera fárus. Maiddái jearahallamiin veaháš healkkeheigga go jerren dakkár gažaldagaid maid eaba lean vuordán, muitala Eira.
Okto proseassas
Filmma proseassas leage son ieš bargan buot. Filbmen, jearahallan, jienaid ordnen ja čuohppan.
– Lean leamaš hui okto dán filmma ráhkadeamis, muhto goitge lean hui giitevaš go lean beassan čađahit ja dahkat dán filmma.
Áigu dahkat eanet filmmaid sámiid birra
Eira bargá dál buvttadanveahkkebargin Romssa fitnodaga Original Film ovddas, ja sii leat aiddobáliid gárven guhkesfilmma «Oskars Amerika». Son muitala sus lei lihkku go oaččui niehkobarggu ovttatmano go gearggai skuvllain, muhto son ii leat guođđán jurdaga joatkit ieš filmmaid dahkamiin.
– Go orun olggobealde Sámi, de dovddan ahte livččii dehálaš ráhkadit eanet filmmaid sámiid dili birra, go dat guoská mu iežan kultuvrii, lohká son ja muitala sus lea juo okta jurdda oanehisfilbmii mas lea sámi fáddá, muhto das ii áiggo vel dovddahit sisdoalu.
Ulbmil ovddidit nuorra filbmadahkkiid
Norgga Dokumentárafilbmafestivála lea Norgga stuorámus ja boarráseamos dokumentárafilbmafestivála, ja lea lágiduvvon juohke giđa Voldas Lulli-Norggas. Festivála ulbmil lea čalmmustahttit Norgga buoremus dokumentárafilmmaid ja ovddidit nuorra filbmadahkkiid.
– Mis lea dáhttu leahkit lávdin Norgga dokumentárafilbmadahkkiide ja dan ahte geahččit galget fuomášit maid Norgga dokumentárat sáhttet fállat, čállet festivála iežaset neahttasiiddus.
Bálkkašumit
Festivála juohká maid njeallje bálkkašumi feastivála oktavuođas. Buoremus guhkes dokumentára, buoremus oanehis/gaskageardán dokumentára, buoremus studeantabuvttadeapmi ja gehččid bálkkašupmi.
Norgga Dokumentárafilbmafestivála lágiduvvo dán jagi cuoŋománu 26. beaivvis gitta 30. beaivái. «Vihtta vahkku vieljain» čájehuvvo 29. beaivvi.