OĐĐASAT Válljejuvvon jođiheaddjin

Válljejuvvon jođiheaddjin

-

-

Sámi Dáiddárráđđái lea válljejuvvon beakkálmas ođđa jođiheaddjin.

Sámi Dáiddárráđi (SDR) jahkečoahkkimis geassemánu 20. beaivvi 2019 válljejuvvui Ann-Mari Andersen, Sámi Komponisttaid searvvis, ođđa jođiheaddjin jahkái. Son váldá badjelasas jođihandoaimma maŋŋá Karen Anne Buljo (SGS), čállá Sámi Dáiddárráđđi preassadieđáhusas.

Eará ođđa stivrralahtut leat Kirsten Marit Olsen (JS), Lene E. Westerås (SDS), Marte Fjellheim Sarre (SL) ja Susanne Hætta (SGS). Niillas A. Somby (SFS) lea válljejuvvon guovtti jahkái 2018 rájes. Stivrra vuođđudančoahkkimis čakčamánu 30. beaivvi válljejuvvui Niillas A. Somby ovttajienalaččat nubbinjođiheaddjin.

Ovddidit miehta Sámi

SDR ođđa stivra galgá ovddidit miellahtoservviid ekonomalaš, dáiddafágalaš ja dáiddapolitihkalaš beroštumiid, ja hukset fierpmádaga ja oainnusin dahkat sámi dáiddáriid miehtá Sámi.

Oktiibidjan rievdan

Eanetlohku miellahttoservviin ledje iežaset jahkečoahkkimiin dán jagi mearridan doarjut njuolggadus rievdadusa nu ahte vuogádat, mas ledje vihtta stivrralahtu, main golmmas ledje miellahttoservviid beales ja guokte olggobeale lahttu, heaittihuvvui. Dan sadjái leat dál guhtta áirasa SDR stivrras, ja buot ovddasteaddjit leat miellahttoservviid beales.

Sámi Dáiddárráđđi lea goavdesearvi guđa dáiddársearvái: Sámi Komponisttat / Samiske Komponister (SK), Sámi Lávdi / Samiske Teaterarbeidere (SL), Juoigiid Searvi (JS), Sámi Filbmabargiid Searvi / Samiske Filmarbeiderforbund (SFS), Sámi Dáiddačehpiid Searvi / Samisk Kunstnerforbund (SDS) og Sámi Girječalliid Searvi / Samisk Forfatterforening (SGS).

- Advertisement -