Kárášjoga Bargiidbellodat beassá gávcciin áirasiin gielddastivrii, ja oažžu dálá bohtosiid mielde njeallje áirasa eambbo ovddit válggaid ektui.
Kárášjoga Bargiidbellodat beassá gávcciin áirasiin gielddastivrii, ja oažžu dálá bohtosiid mielde njeallje áirasa eambbo ovddit válggaid ektui.
Dál leat eanaš jienat lohkkon ja Bargiidbellodat lea duppalasttán gielddastivrra áirasiid. Lihkká lea sátnejođiheaddjievttohas Svein Atle Somby ain hui ráfálaš.
– Dat sáhttá ain rievdat, go galget dárkilit vel lohkat jienaid. Muhto lean issoras duhtavaš válggain ja bohtosiin, dadjá son.
Hui lihkolaš
Svein Atle Somby dadjá iežas dovdan gal válgga mannat bures, muhto ii lean duostan niegaditge ahte ožžot gávcci áirasa sisa.
– Mun lean hui lihkolaš go manai ná bures ja mun giittán álbmoga luohttámušas, dadjá váiban sátnejođiheaddjievttohas.
Somby jáhkkáge ovta siva birgemii, leamaš dat go leat čađat leamaš oidnosis.
– Mii leat čužžon ja muitalan min áigumušaid ja dan lea varra álbmot oaidnán, navdá son.
Buriin mielain nohkat
Dál dadjáge válgavuoiti velledit buriin mielain seŋgii vuoiŋŋastit.
– Dál šaddá issoras buorre nohkkat ja bures oađđit, dat leamaš guhkes beaivvit ja olles čavčča. Mis leamaš nu buorre joavku, deattuha duhtavaš Somby.
Politihkka birra ii Somby dál šat hála, muhto áiggui cakŋat seŋgii ja vuordit iđidii, go loahpalaš bohtosat leat čielgan ja ovdal go duostá illudit.
