Anja Storelv Band almmuhii mannan bearjadaga sin nuppi skearru, ja Ruoŧa sámiid rahčamušat leat dagahan ođđa skerrui ollu politihkalaš teavsttaid.
Anja Storelv Band almmuhii mannan bearjadaga sin nuppi skearru, ja Ruoŧa sámiid rahčamušat leat dagahan ođđa skerrui ollu politihkalaš teavsttaid.
Mannan bearjadaga de almmuhii Anja Storelv ja su musihkkajoavku sin nuppi cd-skearru, man namma lea «niegadit». Almmuheapmi dáhpáhuvai Lulejus Ruoŧas, gos sii maiddái dolle almmuhankonseartta. Storelv, guhte orru Lulejus ieš, lohká dán vuoru válljejedje sii ruovttubáikkis almmuhit.
– Mun vásihin dan hui erenoamážin go guldaleaddjit válde nu bures vuostái min, go olbmot eai soaitte nu hárjánan gullat sámi musihka dán guovllus. Son sávváge ahte skearru maid váldo bures vuostái, go oaivvilda das lea hui dehálaš sáttasátni sidjiide.
Politihkalaš teavsttat
Storelv lohká ođđa skearrus leat čiekŋalit teavsttat ja sáttasátni. Das leat politihkalaš lávlagat, mat govvidit movt dilli lea sámiide Ruoŧa bealde, lohká Storelv ja čilge lávlla «Jieŋat» ođđa skearrus lea čállon dan áiggi go vuosttaš geahččalanbávkaleamit dahkkojedje Gállogis, Johkamohkis. Son muitala dan áiggi sus šattai ollu ođđa musihkka, go fertii oažžut fuolastumi čállot báhpára ala ja musihkkan daid ráhkadit.
– Ii leat eahpádusge ahte leat politihkalaš teavsttat skearrus, muhto eai dan leat visot gal. Das leat maid teavsttat mat munnje leat hui persovnnalaččat go lea mu eanu-rohkki čállán daid. Das lea maid Annikka Märak luohti mielde, ja nu leatge eambbo oassálastán teakstačállinbarggus, muitala Storelv.
Eanet sámi musihkka
Dat skearru leage sin nubbi, ja 2011:s almmuhii joavku iežaset vuosttaš skearru, Viervai – «To the seashore». Storelv lohká dat ođđa skearru lea ollu eanet sámi skearru, go dat ovddit, ja sin musihkka leage eanet gáidan dan guvlui.
– Das galgá gullat ahte lea sámi musihkka, ii dušše gielas, muhto maiddái šuoŋas.
Musihkkalaš mátki
Skearru lea buvttadan Bernt Mikkel Haglund, ja lea báddejuvvon Guovdageainnus. Storelv muitala ovttasbargu lea doaibman hui bures.
– Min joavku lea guhkit áiggi leamaš musihkalaš mátkkis fárrolaga, ja de lea hui gelddolaš ovddidit dan soapmásii gii ii leat leamaš fárus dan seamma mátkkis. Barggadettiin lea leamaš dego mii livččiimet doallan konseartta ovtta olbmui, ja dat maid Bernt Mikkel lea cuiggodan dahje rievdadan lea leamaš buori guvlui, lohká Storelv.
