– Min ovttasbarggus Risttalaš girkuid ovttasbargoráđis Barentsguovllus (SKKB) galgá luohttámuš riikkaid gaskkas ja girkuid gaskkas. Dál fertet váldit bottu dan ovttasbarggus, dieđihit Davviguovlluid bismmat.
Luleju bisma Åsa Nystrøm, Lulli-Hålogalándda bisma Ann-Helen Fjeldstad Jusnes, Uleåborg bisma Jukka Keskitalo, Uleåborg metropolihta ja SKKB nubbejođiheaddji Elia, Davvi-Hålogalándda bisma ja SKKB jođiheaddji Olav Øygard leat sádden oktasaš cealkámuš mediaide mánnodaga mas celket ahte Davviguovllu davviriikkalaš bismmat eai doarjjo Ruošša go lea fallehan Ukraina.
Bismmat, geat gullet Suoma, Ruoŧa ja Norgga ortodoksa girkui ja luhteránalaš girkui, moraštit ja leat vuorjašuvvan soahtama dihte mii dál geavvá Eurohpás.
– Okta min lagas ránnjáriikkain nuorttabealde, Ruošša, lea fallehan Ukraina ja máŋga miljovnna olbmo leat báhtaran ruovttuin eret, čállet bismmat preassadieđus man leat almmuhan mánnodaga.
Báhtareddjiid váldit vuostá
Bismmat rávvejit olbmuid váldit vuostá báhtareddjiid geat dál bohtet.
– Mis lea bismagottis leamaš máŋga jagi buorre ja lagas ovttasbargu iežamet ruošša ránnjáiguin. Min guovllus orrot ollu ruoššat, muhto leat ukrainalaččat maid. Sii leat buohkat vigiheamet soahtamiidda mat dál dáhpáhuvvet, ja mii bivdit olbmuid dáppe davvin bures váldit vuostá sihke ruoššaid ja ukrainalaččaid liekkusvuođain ja ovddasmorrašiin, dieđihit bismmat ja ávžžuhit girkuid ja buot buriid fámuid bures vuostáiváldit báhtareddjiid.
Hirpmahuvvan
Bismmat leat hirpmahuvvan go oidnet sin ovttasbargoustibiid doarjut Ukraina falleheami.
– Mii moraštit ja leat hirpmahuvvan go leat oaidnán ahte ortodoksa girku jođiheaddjit dorjot falleheami. Mii eat doarjjo daid cealkámušaid obanassiige, celket bismmat ja gáibidit soađi bissehuvvot ovttatmano.
Dál gohččot jierpmálašvuođa ja ovddasvástádusa máilmmi jođiheddjiin, ja áigot fárrolaga eará risttalaš girkuiguin ja eará riikkaid girkojođiheddjiiguin ahte Ipmil doallá gieđa máilmmi badjel dán vuorbeáiggis.
Bismmagottit eai háliit dál ovttasbargat risttalaš girkuid ovttasbargoráđi bokte mii lea Barentsguovllus. Dál bissehit buot formálalaš čoahkkimiid stivrrain ja ráđiin, ja eará lágideamit maid ráđđi čađaha, eai galgga čađahuvvot, dieđihuvvo preassadieđáhusas.
