Duođalaš dáhpáhus ja dramatihkka Beardus odne go áibbas amas dievdu bođii mánáidgárdái ja válddii oktavuođa mánáiguin.
Duođalaš dáhpáhus ja dramatihkka Beardus odne go áibbas amas dievdu bođii mánáidgárdái ja válddii oktavuođa mánáiguin.
Politiijat manne Seterveien mánáidgárdái Beardus go muhtin olmmoš lei mannan mánáidgárdái ja ohcan oktavuođa ovttain dahje máŋggain mánáin geat ledje mánáidgárddis, čállá Nordlys aviisa odne.
Gárttai faggi
Go bargit fuomášedje dievddu, de fertejedje čoavdit ášši.
– Gárttai fággi bargiid ja amas dievddu gaskkas, muitala operašuvdnajođiheaddji Nordlys aviisii.
– Mii eat dieđe manne dát dievdu bođii mánáidgárdái ja ozai mánáiguin oktavuođa, muitala politiijabálvá Lars Meland.
Váldán gitta
Politiijabálvá Katrine Grimnes duođašta Nordlys aviisii ahte sii leat viežžan ovtta olbmo mánáidgárddis.
– Mii leat váldán gitta ovtta olbmo, ja mis lea kontrolla su badjel. Okta olmmoš lei mannan mánáidgárdái ja doppe lei dáhpáhus mas mis eai leat vel dieđut, lohká son.
Ožžot veahki dáhpáhusa maŋŋel
Mánáidgárddi jođiheaddji ii áiggo kommenteret ášši vel, ja čujuha Fagertuna ráđđeolbmái.
Beardu suohkana ráđđeolmmái Hege Walør Fagertun muitala ahte leat válljen heahtejoavkku mannat mánáidgárdái go leat gullan mánáidgárddi jođiheaddjis dáhpáhusa birra.
Son ii áiggo eanet kommenteret dáhpáhusa, muhto muitala ahte sii váldet vára mánáin, váhnemiin ja bargiin maŋŋel dán dáhpáhusa, čállá Nordlys.
