Ovcci olbmo šadde evakueret viesus go álggii buollit duorastatčuovganeapmái Tomasjordvegenis Romssas.
Ovcci olbmo šadde evakueret viesus go álggii buollit duorastatčuovganeapmái Tomasjordvegenis Romssas.
Buollin álggii diibmu 02.35, ja beannot diimmu maŋŋel válde politiijat gitta ovtta dievddu gean navdet cahkkehan viesu.
Dutket ášši viidáseappot
Dievddus lei seahkka maid politiijat leat iskan ja váldán.
– Seahkas ledje ávdnasat maid mii vávjit dievddu geavahan go buollahii viesu, muitala Romssa politiijaguovllu politiijaadvokáhtta Gørild Lund Nordlys:i.
– Politiijat dutket dievddu viidáseappot duorastaga, ja giddagasčoahkkin šaddá bearjadaga diibmu 10.30, muitala Lund.
Viessu lei oalát buoláskan go buollinčáskadeaddjit bohte báikái.
– Leat guokte viesu main leat guokte ásodaga, ja garáša lea gaskkas, muitala Romssa politiijaguovllu operašuvdnajođiheaddji Lars Meland NTB:i.
Gulai dola šnjirrama
Viesu ássi, Marie Øvermo muitala NRK:i ahte son lei oađđime go su ovttasássi gulai šnjirrama ja havssii ártegis hája. De oinnii son ahte viessu lei jo buot buoláskan.
– Son čuorvvui munnje ja jearai gos čáhcešláŋŋa lea. Mun viehkalin ohcat dan, muhto fuomášin jođánit ahte čáhcešláŋŋas ii lean ávki. Mun čurvejin mu irgái ahte son ferte dieđihit ránnjáide, lohká Øvermo.
Golmma viesus šadde ovcci olbmo evakueret ihkku. Njealját viesu ássit eai lean ruovttus. Ii okta ge galgga leat roasmmohuvvan buollimis. (©NTB)
