-Almmuhus-
OĐĐASAT Valáštallansearvi cuiggoduvvo rihkkon njuolggadusaid

Valáštallansearvi cuiggoduvvo rihkkon njuolggadusaid

-

-

Mannan vahkkoloahpa vudje Guovdageainnu faláštallansearvvi oaggungilvvu lágideaddjit biillaiguin Guovdageainnu gilišilljui vaikke báikkis leat šiltat mat gildet biilavuodjima giettis. Dasa lassin leat lágideaddjit geavahan bensiidnaaggregáhtaid lahka dološ visttiid, dát lea maiddái njuolggadusaid vuostá go rusttegat ledje sáhttit bullehit visttiid. Guovdageainnu gilišillju moaitá oaggungilvvu lágideddjiid.

Guovdageainnu gilišillju háliidus lea ahte báikkálaččat geavahit gilišillju áŋgirit, muhto dát galgá dáhpáhuvvat jierpmálaččat ja olbmot galget čuovvut njuolggadusaid. Mannan vahkkoloahpa lágidii Guovdageainnu faláštallansearvi oaggungilvvu báikkis, dál moaitá Guovdageainnu gilišillju lágideddjiid.

 

Visttit ledje sáhttit buollát

Gilišilljus leat dološ áittit ja visttit mat leamaš geavahusas 1800-logus ja 1900-logu álggus. Gáhttendihti visttiid, de lea juohke vistti birra 5 mehter suddjejuvvon. Guovdageainnu faláštallansearvi galgá leat geavahan bensiidnaaggregáhta lahka visttiid.

 – Dat vearrámus mii lei sáhttit dáhpáhuvvat lea ahte Guovdageainnu boarráseamos visttit livččii buollát. Bensiidnaaggregáhtta lei sáhttit bullehit visttiid dahje suinniid, ja suoidnebuollin lei sáhttit dagahit stuorát buollima. Dat ii livččii somá. Aggregáhtta lea dárbbašmeahttun, jus lágideaddjit livččii jearrat, de leimmet sáhttit jođasin ordnet sidjiide el-rávnnji. Eat mii háliit bensiinnaid ja gásaid dohko, lohká Guovdageainnu gilišillju konsuleanta ja viessohoaiddár Johan Aslak Hætta.

 


Guovdageainnu gilišillju dološ viesuid birra lea vihtta mehtera eanan suddjejuvvon, muhto dán njuolggadusa rihkkui Guovdageainnu faláštallansearvi go geavahii bensiidnaaggregáhta visttiid luhtte. Dát lei sáhttit bullehit dološ áittiid ja návehiid, váruha visttiid ovddasvástideaddji. Govven: Guovdageainnu gilišillju

 

Badjelgehčče šilttaid

Guovdageainnu gilišilljus leat guokte šilta mat gildet biilavuodjima, muhto Guovdageainnu faláštallansearvvi ovddasteaddjit galget badjelgeahččan dáid.

 – Mun in lean ieš barggus, muhto geassebargi muitala ahte okta biila vujii meattá vuosttaš šiltta, vihtta eará biilla ges vudje nuppi šilta meattá. Lágideddjiin ledje stuora biillat. Eai sii leat doahttalan gildosa. Gieddái leat šaddan luottat, muhto lihkkus ii leat eana billašuvvan nu olu go álggos jáhkken, lohká Hætta, geas lea ovddasvástádus viesuid badjel museašilljus.

 


Guovdageainnu gilišillju konsuleanta ja viessohoaiddár Johan Aslak Hætta. Priváhtagovva.

Guossit parkerensadjái

Dan botta go oaggungilvu lágiduvvui, de ledje gilišilljus maiddái turisttat guossin.

 – Mis ledje badjel 20 guossi gilišilljus. Sii bohte parkerensadjái, eai ge olgomuseii.

Biilavuodjin leamaš maiddái váttisvuohtan gilišilljui ovdal, danin ceggejedje vuos ovtta šiltta moadde jagi áigi. Diibmá bidje vel nuppi šilta.

 – Mis lea stuora parkerensadji, dohko sáhttá guođđit biillaid. Min bargu lea čájehit turisttaide, skuvlamánáide ja earáide mo Guovdageainnus lei dolin, ja dan áigái eai gula biilaluottat. Danin leat šilttaid bidjan deike, čilge Hætta.

 


Guovdageainnu gilišilljus leat guokte šilta mat gildet biilavuodjima. Govven: Guovdageainnu gilišillju

Bovde valáštallansearvvi maiddái boahtte jagi

Guovdageainnu faláštallansearvi lea moadde jagi lágidan oaggungilvvuid gilišilljus. Guovdageainnu gilišillju doaivu ja lea mielas ahte dát joatkkašuvvá maiddái boahtte áiggis.

 – Mii áinnas háliidat ahte atnet gilišillju, muhto dalle galgá jierpmálaččat dan geavahit. Ii dáppe galgga billistit maidege dahje dagahit vahágiid. Mii eat leat suhttan, muhto fertet cuiggodit go leat diehtemeahttumin dahkan boastut. Mii leat valáštallansearvái čállán reivve mas čilget geavahannjuolggadusaid. Mii sávvat ahte lágidit oaggungilvvuid maiddái boahtte áiggis, lea dieđusge heitot ja váidalahtti jus eai lágit gilvvuid boahtte jagi, loahpaha Johan Aslak Hætta.

 

Eai olámuttos

Ávvir lea máŋga beaivvi sihke riŋgen ja sádden teakstadieđuid Guovdageainnu faláštallansearvvi jođiheaddjái ja mánáid ja nuoraid spábbačiekčansearvvi jođiheaddjái, muhto ii goabbá ge leat leamaš olámuttos kommenteret ášši ja muitalit iežaset beali dás.

- Advertisement -
-Almmuhus-