Kárášjogas lea okta guossi muhtun olgobáikkis dan mađe leamaš eddon ahte čorbmadii vávtta go ledje bidjame su olggos.
Kárášjogas lea okta guossi muhtun olgobáikkis dan mađe leamaš eddon ahte čorbmadii vávtta go ledje bidjame su olggos.
Bearjadaga ja lávvordatija lea feara mii dáhpáhuvvan Sámis.
Muhtumis leamaš beare leahttu, moattes fas vuodjinkoartta haga vuodján.
Muhtun eará lea fas leamaš vel dan mađe unnán jierbmái ahte lea vávtta čorbmadan muhtun olgobáikkis Kárášjogas mannan ija, ja dasa gal politiijat eai geahča njuolga gal.
Šaddá vástidit
Finnmárkku politiijaguovllu operašuvdnajođiheaddji, Jan Arne Pettersen, ii loga dan gal jierpmálaš dahkun.
– Gal dainna gal ii ovdan gosage, ja dál beassá min ságain fitnat go čielgá, go mii cegget ášši su vuostá, lohká son
– Mii diehtit gii dat lea, duođašta son.
Bargan barggustis
Pettersen lohká ahte lea easka hui unnán jierpmálaš vávtta čorbmadit gii galgá gozihit ahte visot manná bures olgobáikkis.
– Hui duođalaš go čorbmada almmolaš vávtta gii galgá gozihit báikki. Vákta lea bargan barggustis, ja dan galgá son beassat ráfis dahkat.
– Dan ii leat dán áššis beassan dahkat ja dasa eat mii gal geahča njuolga, lasihastá son vel.
Muđui:
Nuorra luntta massii vuodjinkoartta Álttás go doalai 92km/d báikkis gos leahttomearri lea 50 km/d.
Biilavuoddji bissehuvvui Álttás, sus ii lean vuodjinkoarta, ja dál son váido vuodján biillain vuodjinkoartta haga.
Kárášjogas maid biilavuoddji váldui ikte politiijaide. Sus ii lean vuodjinkoarta, ja šaddá dál vástidit áššis politiijaide.
