Amerihkálaš searvi lea álggahan stuora koronaboahku iskkadeami. Álbmotdearvvašvuođa instituhtta deattuha ahte lea ain olu bargu mii ferte dahkkot ovdal boahku sáhttá váldit atnui.
Amerihkálaš searvi Modeardna lea gárven sihke vuosttaš ja nuppi oasi koronaboahku iskkadeamis, ja bohtosat čájehit ahte lea doaivva lihkostuvvat boahkuin. Nuppi oasis dagai dát eksperimentála Covid-19-boahkus immunitehta buot 45 olbmos geat serve dutkosii, čájeha dutkanartihkal mii almmuhuvvui disdaga.
Dutkit várrejit
45 olbmo geat serve, juhkkojuvvo golmma jovkui – geat ožžo iešguđet stuoru dálkkasmeari guovtti vuorus. Nuppi dálkkasmeari maŋŋel čájehedje bohtosat ahte oasseváldiin lei alit antistoffadássi go eanaš pasieanttain geain lea leamaš koronadávda. Badjel bealli oasseváldiin vásihedje láivves dahje mearálaš liigeváikkuhusaid, mii lea dábálaš. Liigeváikkuhusat ledje earret eará váibbasvuohta, galmmešvuohta, oaivebávččas, bákčasat gorudis ja bákčasat dakko gokko lea boahkuhuvvon.
– Bohtosat leat hirbmat buorit, lohká California Riverside universitehta biomedidiidnaprofeassor, David Lo.
Ain olu bargu
Álbmotdearvvašvuođainstituhtta čuovvu dárkilit mielde koronaboahku ovdáneamis, ja deattuhit ahte lea ain guhká ovdal koronaboahkku lea gárvvis.
– Máŋggat stuora dutkosa fertejit čađahuvvot ja dohkkehuvvot dálkkasgeavahuseiseválddiin ovdalgo boahkku lea álbmogii olámuttos, lohká ossodatdirektevra Karianne Johansen NTB:ii.
