Ruoŧa beale sámediggepolitihkkárat galggašedje oahppat koloniserema birra. Sii oaivvildit dasa lea dárbu, muhto ii leat diehtu goas šaddá, go stivra logai ii gávdno dasa ruhta.
Ruoŧa beale sámediggepolitihkkárat galggašedje oahppat koloniserema birra. Sii oaivvildit dasa lea dárbu, muhto ii leat diehtu goas šaddá, go stivra logai ii gávdno dasa ruhta.
Dievasčoahkkin dohkkehii evttohusa ahte Sámedikki lahtut ja maid earát sámi servvodagas galget oahppat mii koloniseren lea ja mo dat ain váikkuha servvodahkii, čállá sverigesradio.se.
Ii gávdno ruhta
– Lea hui buorre. Oainnán duođaid dárbbu dasa dál go leat bargame oažžut mátkái duohtavuođakommišuvnna, dadjá Marie Persson, LPSS, gii evttohii.
Buohkat ledje ovttaoaivilis ahte koloniseren lea dahkan háviid sámi servodahkii.
– Lea dehálaš ášši, muhto váttisvuohta lea ahte ii gávdno ruhta. Evttohus rievdaduvvui nu ahte go gávdno ruhta, de sii galget stivrra bealis vuoruhit dan, ja dat lea buorre, dadjá Sámedikki stivraságadoalli Håkan Jonsson.
Koloniserema boađus go ii gávdno ruhta
Dutki, gii guhká lea bargan dekoloniseremiin, organisašuvnnain ja stivrabargguin, oaidná dan kolonialisma boađusin.
Dutki Helena Omma čilge dat leage kolonialisma váikkuhus ahte Sámedikkis váilu ruhta daid áššiide mat livčče dehálaččat.
Omma lohká dávjá šaddá nu ahte Sámediggi šaddá vuoruhit áššiid stáhta dáhtuid mielde, iige iežas álbmoga dáhtu mielde.
