Norgga Sámiid Riikkasearvi (NSR) leat duhtavaš go dál juo oidnot Sámedikki ja Oslo gieldda ovttasbargojulggaštusa bohtosat, muhto vurdet ahte Oslo gieldda vuoruheapmi lassána Sámi Vissui ja sámegiela dillái.
Lea jahki dan rájes go ovttasbargojulggaštus dahkkui Oslo gieldda ja Sámedikki gaskkas.
Dál álget bohtosat oidnot, muhto politihkkárat váillahit vel eanet vuoruheami.
Váldet gielladárbbuid duođaš
Stuorámus hástalus lei juksat ovttaoaivilvuođa sámegiela gáibádusas mánáidgárddis.
– Mun illudan signálaid dihte ahte sisdoallu julggaštus doaibmá bures. Gávpotráđđi Tone Tellevik Dahl ja Oslo gielda váldet sámi mánáid giellavuoigatvuođaid duođas go sii almmuhit ahte lea dárbu sámegielat pedagogaide mánáidgárdái, nu go julggaštusas boahtá ovdan, čilge sámediggeáirras Ann-Mari Thomassen preassadieđáhusas.
Ávžžuha lasihit doarjaga
Sámediggeáirras Mátta-Norgga válgabiires, Tor-Gunnar Nystad (NSR) lea ovttaoaivilis gávpotráđđi Tellevik Dáhlain ahte Sámi Viessu Oslos ferte ovdánahttit viidáseappot lohpádusaid mielde maid ovdal lea dadjon.
Sámediggi lea lasihan jahkásaš doaibmajuolludeami Sámi Vissui sihke 2016is ja 2017is.
– Oslo gielda lasihii maiddái juolludeami Sámi Vissui 2017is, muhto mu dieđu mielde lea lasáhus ain prošeaktadásis. Mun ávžžuhan gávpotráđi lasihit juolludeami nu ahte boahtteáiggis boahtá seamma dássái go Sámediggi. Lea dárbbašlaš ahte doaibmaruđat juolluduvvojit jahkásaččat , lohká sámediggeáirras Nystad.
Árgabeaivvi sámegiel arena váilu
Guktot sámediggeáirasat cuiggodeaba dan go Oslos leat ollu sápmelaččat, muhto uhcán sámegielat arenat árgabeaivvis.
Nu leige buorre go almmolaš giellalávdegoddi evttohii, iežas NOUas – Váibmogiella, ahte Oslo gielddas berre leat erenoamáš ovttasvástádus davvi-, julev- ja máttasámegiela ovdáneapmái.
Dát geatnegahttá sihke Oslo gieldda ja Sámedikki ovttasráđiid čielggadit mo dán ovddasvástádusa čoavdit.
Ásahit sámi giellaguovddáža
Thomassen ja Nystad ávžžuheaba Oslo gieldda ja Sámedikki fas rahpat ságastallamiid Sámi Viesuin ásahit sámi giellaguovddaža.
Lassin oaivvildeaba áirras guoktá ahte Sámediggi ja Oslo gielda berrešiivčče láhčit dili cegget sámi luohká Kampen skuvlii, gos oahpahus addo maiddái sámegillii eará fágain go dušše sámegiel oahpahusas. Dat livččii stuorra lávki ovddos guvlui sámegiela ektui Oslos.
Dalá presideanta Aili Keskitalo, (NSR) ja gávpotráđi njunuš Raymond Johansen (BB) vuolláičáliiga ovttasbargojulggaštusa gaskal Sámedikki ja Oslo gieldda. Julggaštusbargu álggahuvvui ovttasbargočoahkkimis Guovdageainnus njukčamánu 18.beaivvi 2014is gaskal dalá sámediggeráđi Ann-Mari Thomassen(NSR) ja dalá gávpotráđi Anniken Hauglie (O).
