-Almmuhus-
-Almmuhus-
OĐĐASATVáillaha sáme­giela Suodja­lusa bálva­lusain

Váillaha sáme­giela Suodja­lusa bálva­lusain

-

-

– Buot 17-jahkásaččat šaddet deaivvadit suodjalusbálvalusain, jearatkeahttá háliidit go vai eai, dan čađa ahte šaddet sáddet iešdieđáhusa dohko, mii lea vuođđun das ahte gohččot go du sešuvdnii. Dat lea neahttavuođđuduvvon jearaldatskovvi mas leat persovnnalaš gažaldagat. Iešdieđáhus-skovvi ii leat sámegillii, čállá Sara Katrine Aleksandersen Sámedikki ođđa áššiid dieđiheamis.

Gávdnojit ollu sámi nuorat geain lea sámegiella eatnigiellan, ja muhtin sámi hálddašansuohkaniin lea sámegiella sin beaivválaš gulahallangiella. Dat mielddisbuktá ahte vaikko eatnasat ipmirdit ja máhttet dárogiela, go dat lea sin nubbegiella, de liikká ii sáhte vuordit ahte 17-jahkásaččat hálddašit dárogiela čálalaččat nu bures go galget vástidit persovnnalaš jearaldatskovi. Dat sáhttá earenoamážit leat hástaleaddjin sidjiide geain lea dysleksiija.

– NSR sámediggejoavku oaivvilda ahte suodjalusbálvalus berre dulkot sámelága giellanjuolggadusaid ja doahttalit daid. Sápmelaččat geat leat hálddašanguovlluin sis lea ovdamearkka dihte riekti oažžut vástádusa sámegillii dakkár almmolaš ásahusain. Suodjalusa bálvalus galggašii unnimusat juobe fuolahit ge ahte jearaldatskovvi lea sámegillii buot sámi 17-jahkásaččaide Norggas, čállá Aleksandersen.

NSR sámediggejoavku gohčču Sámediggeráđi bargat dainna ahte suodjalusbálvalus váldá atnui sámegiela, vai sámi álbmot beassá geavahit sámegiela go deaivvadit suodjalusbálvalusain.

Ovttajienalaš dievasčoahkkin mearridii sáddet ášši ráđđái meannudeapmái.

-Almmuhus-