Deatnulaš Hilde Porsangeris livčče hálu máhccat ruoktot Deanu gildii, muhto váilevaš láigoviesut gielddas dagaha ahte šattašii álgovuorus áhččis lusa fárret.
Deatnulaš Hilde Porsangeris livčče hálu máhccat ruoktot Deanu gildii, muhto váilevaš láigoviesut gielddas dagaha ahte šattašii álgovuorus áhččis lusa fárret.
Ii leat nu miella fárret áhčči lusa, dál livččen gearggus fárret ruoktot muhto hástalus lea viesu gávdnat láigohit, dadjá Hilde Porsanger ja lasiha ahte moadde jagi dás ovdal válden oktavuođa Deanu sátnejođiheaddjin Frank Ingilæn dainna sávaldagain ahte gielda berre hukset eambbo láigoviesuid.
Hilde Porsanger dáhttu dál gieldda politihkkáriid vuoruhit láigoviesuid hukset.
– Ii buohkain leat ráđđii hukset dahje oastit viesu iešguđet sivaid geažil. Dál lea sáhka ahte politihkkárat háliidit oažžut olbmuid ruoktot fárret, muhto datge ii oro dáhttu maidige bargat váilevaš viessohástalusain. Lea dehálaš ášši maid dáhtošin politihkkáriid váldit duođalaččat, lohká Porsanger.
Priváhta láigohit beare divrras
Deanu gielddas nu mo eará báikkiin sáhttá priváhtas láigohit orronsaji, muhto Hilde Porsanger lohká láigohattit lea dan mađe badjin, ahte ovtta olbmuid šaddá beare divrras.
– Šattašin máksit eambbo go oaivegávpogis, Oslos, jus galggan priváhta olbmos láigohit. Nu go dál lea dilli de in sáhte fárret Detnui, muitala son. Porsanger deattuha jus orronmokta galgá gildii boahtit, de fertejit gieldda politihkkárat maid láhččit dili vai olbmuide lea dálut.
– Dál hállet orrunmovtta birra, muhto mun in ádde gos ja maid áigot fállat olbmuide go eai leat viesut gielddas, lohká Porsanger.
30 olbmo vuordinlisttus
Deanu gielddas lea 29 dábálaš orrunsaji láigumassii, muđuid lea 50 orrunsaji dikšu- ja fuolahus ossodagas, ja veahkkebálvalusas leat 55 orrunsaji. Dál leat sullii 30 olbmo vuordimin orrunsaji ja 25 proseantta sis leat bearašolbmot mat leat vuordimin dábálaš orrunsaji.
Stuorra hástalus
Deanu sátnejođiheaddji Frank Martin Ingilæ ja Bargiidbellodaga sátnejođiheaddjievttohas miehtá ahte gielddas lea hástalus fállat orronsaji buohkaide, muhto datge deattuha ahte gielda lea áŋgirit bargan erenomážit čoavdit dili.
– Mii leat huksen ja láhčán dili priváhta entreprenevrraide hukset eambbo orronsajiid. Mii oaidnit erenomážit Deanu guovddážis lea stuorra hástalus ahte lea váilevaš orrunsajit, lohká son.
Vuorkágovva/Inga Marie Guttorm
Lohpida vuoruhit viessohuksemii
Ingilæ lohká Bargiidbellodaga bargan ja boahtá áin joatkit áŋgiruššama háhkat doarvái viesuid gildii.
– Mii leat vuoruhan hukset ja ođasmahttit gielddaviesuid dán áigodagas, ja boahtit ain joatkit boahtte áigodagas, lohpida son iežas jienasteddjiide. Son datge lohká ahte lea stuora hástalus háhkat doarvái orrunsajiid.
– Mii fertet fokuseret orrunsajiid, go lea dehálaš ahte lea doarvái viesut, lohká son.
(Ášši lea almmuhuvvon báberaviissas 01.09.15)
