Sámediggeráđđi lea meannudan 2020 giđa girjjálašvuođaohcamušaid, ja vuoruha addit doarjaga mánáidgirjjiide mat leat julev- ja máttasámegillii.
Sámediggi lei ožžon logenáre ohcamuša smávit lágádusain ja eará girjjálašvuođaaktevrrain. 2020 girjjálašvuođabušeahtta lea 2,85 miljovnna ruvnno.
– Go girjjálašvuođaohcamušaid vuođul dán vuoru juolluduvvo váile 2 miljovnna girjjálašvuhtii, de dat duođašta alla dási girjjálašvuođaohcamušain, dadjá sámediggeráđđi Henrik Olsen (NSR).
Fátmmastit viidát čáppagirjjálašvuođa
Sámediggi muitala preassadieđáhusas ahte ohcamušat ledje girját ja fátmmastedje viidát čáppagirjjálašvuođa, go bohte ohcamušat sihke mánáid, nuoraid ja rávesolbmuid várás. Várjjaga guovllus leat duodjegirjjit ožžon doarjaga, ja nu lea maid fágagirjjálašvuohta gokčojuvvon dán ohcanvuorus.
Sii čállet maiddái ahte lea stuora dárbu nuoraid girjjálašvuhtii, ja dán ohcanvuorus leat máŋga prošeavtta ožžon doarjaga mat vuoruhit nuoraide fálaldaga. Earret eará lea Thomas Hansen ožžon juo goalmmát ja maŋemuš girjái Jápmingilvu-trilogiijas doarjaga.
Árran julevsáme guovdásj vuosttaš geardde doarjaga
Trøndelága fylkkagirjerájus ja Árran julevsáme guovdásj ožžot doarjaga rámmašiehtadusaid bokte ovddidit mánáidgirjjiid mátta- ja julevsámegillii. Dál lea vuosttaš geardde go Árran julevsáme guovdásj oažžu rámmašiehtadusa fuolahit mánáidgirjjiid julevsámegillii. Rámmašiehtadusa bokte jorgaluvvojit moanat girjjit sihke mátta- ja julevsámegillii, ja nu ordnejit čáppagirjjálašvuođafálaldaga mátta- ja julevsámegielat mánáide.
– Dát doaibma lea earenoamáš bures lihkostuvvan Mátta-Sámis gos leat ilbman ollu mánáidgirjjit máttasámegillii maŋemuš jagiid, dadjá Olsen.
