-Almmuhus-
OĐĐASAT– Váikkuha duojár­iidda go buot márkanat leat heaitti­huvvon 

– Váikkuha duojár­iidda go buot márkanat leat heaitti­huvvon 

-

-

Mannan vahkus dieđihii Johkamohki gielda ahte Johkamohkemárkanat eai lágiduvvo fysalaččat koronadávdda leavvama dihte. Dat lei stuora váikkuhus sámi kulturealáhussii ja duojáriidda, čilge silbačeahppi Torild Labba.

Johkamohkemárkanat leat lágiduvvon 461 jagi maŋŋálaga muhto boahtte jagi šaddet digitála márkanat. Sámi silbačeahppi Torild Labba álggahii iežas fitnodaga «Karesuando silver» 1984:s. Son bargá dál ruovttus Badje Sohpparis silbbain. Labba lea vuovdán iežas silbabuktagiid Johkamohki márkaniin 1986 rájes. Son čilge ahte Johkamohki márkanat leat sturron ja sturron, ja diibmá ledje badjel 50 000 olbmo márkaniin. Johkamohki márkaniin láve son vuovdit eanemusat silbbaid olles jagis. 

– Johkamohki márkanat leat deaŧalaččat sámi duojáriidda jahkásaččat. Dat ii leat dušše dan maid vuovdá dan vahkuloahpa, muhto doppe olbmot maid diŋgojit mus silbbaid. Márkaniin oažžu maid oktavuođa olbmuiguin ja sii oidnet mu silbbaid. Dat lea hui somá deaivat olbmuid márkanis juohke jagi. Dat hal ii dušše čuoččo ja vuovdde, dat hal lea maid dat sosiála oassi, beassat ságastit earáiguin ja deaivvadit, čilge Labba. 

Eará márkanat

Labba čilge ahte eai leat dušše Johkamohki márkanat mat leat šluhttejuvvon dán jagi. Olu sámi doalut ja márkanat leat maid heaittihuvvon koronapandemiija dihte, čilge Labba. Nu maid eai leat dat sisaboađut mat lávejit márkaniid oktavuođas.

– Visot lea dego bissánan, muhto ii jur visot čilge son. Vehá gal skuhčá. Muhto dál ii dovdo seamma hušša dego ovdal láve, čilge Labba. Dat lea dego ahte buot sámi doalut leat heaittihuvvon dehe maŋiduvvon dál, čilge sámi duojár Torild Labba. Dieđusge dat váikkuha vuovdimii ja márkanii, čilge Labba. 

VUOVDÁ SILBBAID: Torild Labba lea juohke jagi 1986 rájes vuovdán iežas silbbaid Johkamohki márkaniin. Muhto boahtte jagi ii sáhte go márkanat eai lágiduvvo fysalaččat. Labba vuovdá silbbaid ja liinniid Sámiid oahpahusguovddážis Johkamohkis márkanáiggi ovttas iežas mánáidmánáin Ida Persson Labbain. Govva: Priváhta 
VUOVDÁ SILBBAID: Torild Labba lea juohke jagi 1986 rájes vuovdán iežas silbbaid Johkamohki márkaniin. Muhto boahtte jagi ii sáhte go márkanat eai lágiduvvo fysalaččat. Labba vuovdá silbbaid ja liinniid Sámiid oahpahusguovddážis Johkamohkis márkanáiggi ovttas iežas mánáidmánáin Ida Persson Labbain. Govva: Priváhta 

Vuonnamárkanat

Torild Labba muitala ahte eará vuovdinbáikkit Sámis leat maid heaittihuvvon korona dihte.

– Dán jagi eai lágiduvvon Vuonnamárkanat ge Unjárggas. Ja unnit juovlamárkanat eai dáidde ge lágiduvvot dan jagi, čilge Labba. Dat unnu dieđusge sisaboahtu ja váikkuha ekonomalaččat fitnodagaide ja duojáriidda, čilge Labba. 

Dilli váikkuha 

Son ii sáhte vel dadjat movt koronadilli váikkuha sámi duojáriidda ja smávva fitnodagažiidda ovddos guvlui. 

– Dál ii dieđe vel dal mot dat dilli váikkuha dan ferte oaidnit. Muhto dat diŋgojumit maid oažžu márkaniid oktavuođas gos deaivvada olbmuiguin eai boađe dal. Muhto nu lea dat koronadilálašvuohta. Mii das boahtá dan ii dieđe vel, dadjá son. 

Diŋgojumit

Torild Labba čilge ahte olbmot dovdet su ja su buktagiid ja ahte oažžu diŋgojumiid ain. Son bargá juohke beaivvi silbbain, muhto son ii dieđe movt šaddá ovddos guvlui, go olbmot eai heajastala eaige lágit doaluid dál korona dihte.

– Dál eai lágiduvvo stuorit sámi doalut go olbmot čiŋadit ja dárbbašit silbbaid, muhto oaidnit mot šaddá ovddos guvlui. Muhto gal dilli buorrána, jáhkká son. 

Digitála márkanat

Sámi silbačeahppi Torild Labba áigu seavat iežas fitnodagain muhtinlágan digitála vuovdimii dan koronaáiggis go son lei vuordán ahte Johkamohki márkanat eai lágiduvvo dán dilálašvuođas. 

– Mii leat moadde duojára ja smávva sámi fitnodaga geat áigut čájehit min dujiid ja buktagiid interneahtas, dadjá Labba. 

-Almmuhus-