Olgešbellodaga vuosttaševttohas Nuortaguovllus Nils Kristian Winther lohká leat stuorra losses áššit mat lea váikkuhan Olgeža bohtosiid Sámediggeválggaide.
Nuortaválgabiirre Olgešbellodaga vuosttaševttohas Nils Kristian Winther lohká fertet guorahallat mii lea mannan boastut, dál go logut leat válbmasat.
– Mii dieđusge leat duhtavaččat go Olgeš lea ain ráđđehusas ja go šaddá borgárlaš eanetlohku, muhto mii leat dieđusge beahtahallan ja livččiimet sávvan buoret bohtosiid sámediggeválggas. Mii oaidnit ahte sihke Olgeš ja Árja mannet maŋás, Árja massá golbma áirasa ja Olgeš massá ovtta. Dat lea mo logut leat dál, muhto eai leat vel buot jienat lohkkon, dadjá Nils Kristian.
Losses áššit
Son oaivvilda Olgeš bellodagas leat guokte losses ášši mat leat váikkuhan válgabohtosiidda.
– Mii oaidnit ahte leat máŋga losses ášši mat leat váikkuhan, earet eará Deanosoahpamuš. Mii oaidnit Sámedigge- ja Stuorradiggeválggain leat čanastagat, nu ahte regiovdnareforbma lea váttis ášši Olgeš bellodahkii, lohká son.
Áigi guorahallat
– Mii fertet guorahallat mii lea doaibman ja mii ii leat doaibman, muhto lean rámis mo Olgeš lea birgen nuortaguovllu válgabires. Muhto dál lea áigi gávdnat mii manai boastut, deattuha Olgešbellodaga vuosttaševttohas Nils Kristian Winther.
Maŋŋebárgga iđida lei 79,4 proseantta sámediggeválgga jienain lohkkon, de ožžot 6,2 proseantta jienain ja orrot oažžumin ovtta áirasa Sámediggái, gii lea Lars Filip Paulsen Viesttarmeara válgabiirres.
Dáid loguid mielde lea Olgeš mannan 0,8 proseantta maŋás 2013 válgga rájes ja masset de ovtta áirasa.
