Finnmárkku politiijain lei leamaš vehá eanebuš bargu mannan ija ovddit ija ektui, dan dieđihit politiijat Twitteris.
Mannan ija váido golbma nuora Hámmárfeasttas politiijaide narkotihka geavaheames ja maiddái go sis lei narkotihka hálddus. Politiijat dutket ášši viidáseappot.
Muhtin nisu 30 jagiin váido politiijaide go muosehuhtii ja rikkerii almmolaš virgealbmán Hámmárfeasttas. Nisu gevrejuvvui eret gávpotguovddážis.
Moatti diimmu maŋŋá, sullii beal njealjis ihkku, ožžo fas politiijat Hámmárfeasttas dieđu ahte muhtin badjelmeare juhkan olmmoš lea márkanis ja ii ge nagot gávdnat ruoktot. Politiijat fertejedje doalvut su ruoktot.
Hámmárfeasta politiijat ožžo odne iđđedis dieđu ahte muhtin badjelmeare juhkan ja váttis olmmoš lea gávpotguovddážis. Go politiijat jovde dohko, de ii lean šat dat olmmoš das.
Dárkkistedje johtolaga
Geaidnopolitiijat dárkkistedje 83 biilavuoddji Hámmárfeasta guovllus. Golmmas daiguin šadde máksit sáhkku, okta go ii lean fáskon ovdaglása buhtisin, guovttis fas mátketelefovnna geavaheames vuojedettiin.
Álttás maid dárkkistedje geaidnopolitiijat johtolaga E6 geainnus. Oktanuppelogis bissehuvvo. Buohkat láhttejedje lobálaččat.
Rikkeren olgobáikkis
Guovžajávrris fertejedje politiijat fitnat muhtin dálus golmma sullii ihkku dáhttumin feastadolliid jaskkodit.
Honnesvágis fas gohččojuvvui muhtin nuorra, ovtta sullii ihkku, eret gávpotguovddážis go lei rikkeren muhtin olgobáikkis.
Biddjui giddagassii
Kirkonjárggas biddjui muhtin almmái 40 jagiin giddagassii go ii doahttalan politiijaid gohččuma, guođđit gávpotguovddáža rikkereme geažil.
Politiijat maid šadde gevret muhtin albmá, 30 jagiin, eret muhtin olgobáikkis ja gávpotguovddážis go almmái lei rikkeren ja láhtten váttisin. Almmái doahttalii politiija gohččuma.
