-Almmuhus-
OĐĐASATVáidán Nussir ruvkedoaimmaid politiijaide: – Mis eai leat nu olu meahcit, bávttit ja...

Váidán Nussir ruvkedoaimmaid politiijaide: – Mis eai leat nu olu meahcit, bávttit ja várit ahte sáhttit visot ruivet

-

-

Fiettar orohat lea dál váidán ruvkefitnodaga Nussira politiijaide, dan dihte go oaivvildit ahte leat bidjan johtui lobihis bargguid.

– Mun lean orohaga jođiheaddji, ja mun lean váidán orohaga ovddas. Ja dat ágga man dihte mii leat váidán lea go ruvkefitnodagaovddasteaddjit leat bidjan johtui lobihis bargguid. Dat lobihis barggut leat dieđusge goaivut min guohtuneatnamiid lobitkeahttá. Dás leat olu váilevašvuođat ovdal dat sáhttet álgit roggat, ja dan vuođul de leat váidán, muitala Fiettarorohaga jođiheaddji, Nils Utsi.

Eai ohcan ekspropiašuvnna

Son muitala ahte vuosttaš lobihisvuohta maid Nussir fitnodat lea bargan, lea ahte ii leat ohcan ekspropriašuvnna, juoidá maid ferte bargat ovdal beassá álgit goaivut. Dasa lassin eai leat gáibidan ovdagittiidálggaheami.

–  Mii leat guoddalan ášši gos mii čuoččuhit ahte ášši lea lobiheapme. Dan lobi maid stádaeisseváldi attii konsešuvnnas, ii leat váldán vuhtii boazodoalu váikkuhusaid, heaittihanáitagiid ja diekkáriid, dadjá Utsi.

Son namuha ahte leat golbma ášši mat váilot. Vuosttažin lea ekspropriašuvdna, nubbin lea ovdagittiidálgin, ja goalmmát lea tunealla maid áigot ráhkadit eará báikkis go konsešuvnna oktavuođas leat.

– Dat lea olu mii ii leat sajis, ja dan fertejit politiijat dutkat ahte lea go nu go mii orohagas oaidnit, dadjá son.

Loga maid:
Fiettar orohat stevdne stáda bissehan dihte Nussir álggaheami: – Geavahat vaikko dan maŋimuš bohcco vel doarrut Nussira vuostá

Jáhkká nagodit bissehit vuosttas vuorus

– Mii fertet dál oaidnit, jos Nussir dál ii bisset iežas barggu politiija váidaga dihte, de mii váldit duopmostuolus gaskaboddosaš mearrádusa gos mii gáibidit ahte galgá bissehuvvot dassážii go buot lobit leat sajis, muitala Utsi.

Son muitala ahte leat hui sihkkarat ahte galget leat lobit sajis ovdagol álget goaivut. Sus lea garra doaivva dan ektui ahte sii galget nagodit bissehit juste dien barggu nie mo dál lea áigumuš.

– Jos lea nu ahte eat oaččo daid duopmustuoluin veahki maid mii jurddašat mii galgat oažžut dán áššis, de manná olmmošvuoigatvuođaduopmostullui. Dat lea jos eat oaččo sisriikaduopmostuoluin veahki, dadjá son.

Golaheapmi ferte unnut

– Mii fertet oaidnit, eat dušše mii sápmelaččat, muhto olles máilbmi ahte min iežamet golaheapmi ferte unnot boahtteáiggis. Mis eai leat nu olu meahcit, bávttit ja várit ahte sáhttit visot ruivet. Gokčat goargatvuođa golaheami ektui, die lea ávžžuhus olbmuide, dadjá Utsi.

Son maid dadjá ahte ii sáva ahte dilli boahtá nu guhkás ahte oktage boazodoalli sámis ferte heaittihit iežas ealáhusa eará billistemiid dihtii.

Nussir ruvkefitnodaga direktevra Øystein Rushfeldt ii loga leat ožžon politiijain makkárge formálalaš dieđu váidaga birra, ja iige háliit kommenteret ášši vel.

-Almmuhus-