– Váidalahtti go presideanta ii namuhan Nussirášši Parisas

– Go sámi politihkalaš njunuš ii sániinge namut dan stuorámus vuoigatvuođaášši Norgga bealde, dalle go sus lea vejolašvuohta olles máilmmi oažžut geahčestit mii dáhpáhuvvá dáppe ruovttuguovllus, de lea dat váidalahtti. NSR vuittii ollu jienasteddjiid go ledje vuostá ruvkedoaimmaid, ja lohpidedje ovddidit sámiid rivttiid. Lea dohkketmeahttun go sámediggepresideanta lea jávoheapme, go boazosámit ja mearrasámit oidnet iežaset birgenlági jávkame, ja mii vuordit ahte presideanta atná iežas posišuvnna ovddidit sámiid rivttiid, go dan lea son geatnegahtton dahkat, lohká Árjja sámediggeáirras Inger Eline Eriksen.

Eriksena mielas lea Birasdirektoráhta mearrádus váilevaš, dohkketmeahttun ja rihkku olmmošvuoigatvuođaid. Son lea beahtahallan go sámediggepresideanta Aili Keskitalo, geas ikte lei sáhkavuorru dálkkádatčoahkkimis COP21 Parisas, ii namuhan Nussira ášši sániinge.

Loga maid: – Álgoálbmotvuoigatvuođat fertejit vuhtii váldot Parisas

Ii priváhta olmmožin

Fiettar orohaga ovdaolmmoš Mikkel Nils Sara lohká iežaset ávžžuhan presideantta váldit ovdan Nussir-ášši iežas sáhkavuorus, go Birasdirektoráhta mearrádus lei seamma beaivvi go su sáhkavuorru, ja dat livččii leamaš hui buorre vejolašvuohta čuvgehit ášši máilbmái.

– Árjjas lea riekta cuiggodit presideantta, go min mielas livččii leamaš presideantta ovddasvástádus čalmmustahttit mii dáppe Sámis dáhpáhuvvá. Mii leat ožžon čilgehusa ahte presideanta lea bealálaš áššis, muhto dat lea oalle ártegis ákkastallan go ii son leat priváhta olmmožin doppe, muhto Sámedikki ja sámiid njunušin, lohká Sara.

Ii ollu dobbelii

Fiettar lea olles ruvkedoaimmaid vuostá, ja Sara lohká dát ivttá lobi addin lea unna lávkkáš ollašuhttit ruvkke, muhto ášši ii leat dađi dobbelii ollen.

– Min oaivil lea ahte regulerenplánas lea eaktu ahte mii galgat soabadit Nussir ASA:in , ja mis ii leat makkárge soahpamuš, nu ahte mii dulkot nu ahte regulerenplána ii leat dohkálaš.

Sara lohká dát merriiluoitinmearrádus dieđusge ii váikkut nu ollu siiddaide mat leat guovllus, muhto meara geavaheddjiide, nu movt guolásteddjiide.

– Dat maid dál leat oaidnán dáinna mearrádusain lea ahte eanet ruvkevuostálastit bohtet fárrui.

Fokusa doallat

Bivdi mearrasámi bivdo- ja guolástansearvvi jođiheaddji Torulf Olsen ii áiggo kommenteret maid Keskitalo ii leat lohkan, go oaivvilda dat ii leat nu dehálaš.

– Dál lea dehálaš doalahit fokusa baicca, ja mii doalahit dasa maid Sámedikki ráđđelahttu Silje Karine Muotka lea lohkan, geas lea ráđis ealáhusaid ovddasvástádus. Bivdi bealis leat dáhtton čoahkkima Sámedikkiin gos háliidit čielggadit movt dat ođđa konstitušuvdna, mas leat NSR ja Bargiidbellodat, oaivvildeaba, lohká son.

Dál easka álgá gižžu

Bivdi lei okta vuosttaš servviin mii álggii vuosttaldit merrii luoitit ruvkebázahusaid Riehpovuonas. Searvi lohká iežaset leat beahtahallan Birasdirektoráhta merriiluoitinlohpái, muhto eai leat eisege vuollánan dainna.

 – Dat duohta gižžu bissehit merrii luoitit ruvkebázahusaid álgá easka dál, ja vuosttaš geaidnu lea geahččalit oažžut ášši hilgojuvvot, ja ráhkkanit vejolaš lágasteapmái. Jus mearrádus bisuhuvvo, de lea váikkuhus ahte geavvat gáddái, lohká son.

Ferte lága čuovvut

Sámedikki presideantta čilge son lea bealálaš juste dan Nussir ruvke áššis, danne go su oabbá lea stivrajođiheaddji fitnodagas mii ovttasbargá Nussir ASA fitnodagain.
– Fitnodat lea Arctic drilling, mas lea maid mu oappá isit stuorimus eaiggát. Lean rávvagiid ožžon juristtain ahte sihkarvuođadihti galggan garvit Nussir ášši. Lea maid nu ahte bealálašvuođas leat lágat maid ferten čuovvut, ja dat gustojit maiddái sámedikki presideantta, lohká Keskitalo čilgehussan manne sátnevuorustis Parisas ii namuhan Nussir ášši.