Sámediggeráđđi váidá fylkkadikki mearrádusa go eai leat guorahallan makkár váikkuhusat guollebiebmanásahemiin leat árbevirolaš guolástussii davvi- ja nuorttabealde Ráinna Gálssa suohkanis.
– Heittot lea dat go váikkuhaniskančielggadus biehttaluvvo sálašloguid ja ekonomiija mielde dušše dan ektui mii guoská Ráidnii, dadjá sámediggeráđđi Ronny Wilhelmsen preassadieđáhusastis.
Bivdu guovllus
Lubben ja Korsneset báikkiide lea addojuvvon konsešuvdna, maŋŋá go lea meannuduvvon fylkkadikkis juovlamánus. Sámediggi oaivvilda ahte lea dárbu dahkat váikkuhusiskanguorahallama dieđuiguin báikkálaš aktevrraid beales árbevirolaš geavaheami birra ja man deaŧalaččat bivdoguovllut leat vuođđun konsešuvnna addimii.
– Bivddu mii lea guovllus berre geahččat eanet ollislaččat, dadjá Ronny Wilhelmsen.
Bivdet guorahallama
Váidagis Fylkkadiggái ođđajagemánu 12. beaivve bivdá sámediggeráđđi ahte guorahallojuvvojit váidudeaddji doaibmabijut márkana ja vuovdinvejolašvuođa jurddašettiin árbevirolaš bivddu ektui guovllus.
– Mun oainnán ahte báikki guolásteddjiid ja geavaheddjiid máhttu guovllus lea unnán deattuhuvvon konsešuvdnaohcama meannudeamis. Lagaš bivdoguovlluid árbevirolaš geavaheamis lea stuorra mearkkašupmi báikkálaš servodahkii gullevašvuođa ektui, ja dat lea ain birgejupmin sámi guovlluin, dadjá Wilhelmsen.
