Bargiidbellodaga Sámediggejoavkku mielas lea Norgga Almmolaš Čielggadeapmi (NÁČ) «Váibmogiella» evttohan ollu buori doaimmaid ožžodit eambbo sámi giellageavaheddjiid, muhto de ferte ráđđehus juolludišgoahtet eambbo ruđa.
Bargiidbellodaga Sámediggejoavkku mielas lea Norgga Almmolaš Čielggadeapmi (NÁČ) «Váibmogiella» evttohan ollu buori doaimmaid ožžodit eambbo sámi giellageavaheddjiid, muhto de ferte ráđđehus juolludišgoahtet eambbo ruđa.
– NÁČ 2016:18 Váibmogiella, evttoha ollu buriid doaimmaid ja ortnegiid sámegielaide, ja lea positiivvalaš ahte lávdegoddi lea vuđolaččat guorahallan giellaealáskahttinproseassa, dadjá Bargiidbellodaga parlamentáralaš jođiheaddji Vibeke Larsen.
Áitojuvvon gielat
Lávdegoddi lea gávnnahan ahte julev- ja lullisámegiella leat duođai áitojuvvon gielat. 100 iešguđetlágan doaimma listejuvvojit vai oažžu eambbo sámi giellageavaheddjiid.
Ollu doaimmaid lea vejolaš čađahit jus eará ládje vuoruha dálá gaskaomiid ja eará doaimmat ges fas gáibidit eanet ekonomalaš resurssaid ja sámi giellavuoigatvuođaid nannema, masa otná ráđđehus ii leat beare positiiva gal, čállá Bargiidbellodat preassadieđáhusastis.
– Váibmogiela áŋgiruššan sáhttá šaddat dušše váibmošuohkasin, jus ráđđehus ii bargagoađe dáinna, ja lasit ruhtajuolludanleahtu, joatká Vibeke Larsen.
Juohkit golmma oassái ruđaid
Bargiidbellodat čállá sii leat miehtemielas doaimmaide das ahte juohkit golmma oassái guovttegielalašvuođaruđaid juolludaneavttuid suohkaniidda golmma kategoriijii, giellabisuhan-, giellaealáskahttin- ja gávpotsuohkaniidda.
Dainna lágiin nagodit álkibut joksat mihttomeari ahte galget šaddat eanet sámi giellageavaheaddjit.
Boahtteáiggi giellageavaheddjiid olahit
Giellaáŋgiruššan ferte álgit mánáidgárddiin ja vuođđoskuvllas, gos gávdná boahtteáiggi giellageavaheddjiid.
Dát gáibida ahte gávdnojit eanet sámi oahpponeavvut, oahppoávdnasat ja digitála veahkkeneavvut.
– Stuoradiggi sáhttá juo dán čavčča bušeahttameannudeamis leat mielde álbmogassii addimis áŋgiruššandoaimmaid sámi giellaovdáneapmái. Sámegiella lea váibmogiella ja dat ánssáša stuorát saji almmolaš bušeahtain, loahpaha Vibeke Larsen.
