Go skuvla álgá, galget máŋggaid duhádiid viđa- ja guđajahkásaččat skuvlaluottaid ala vuosttaš geardde. Muhto lea go de oadjebasat? Guovttis vihttasis, geat dovdet skuvlaluottaid buoremusat, oaivvildit ahte ii leat oadjebas.
Skuvlaluottaid alde leat dávjá olu várálašvuođat mánáide. Ovttas njealji ollesolbmos lea dat oaidnu skuvlaluottaid birra ahte eai leat oadjebasat mánáide, čájeha ođđa iskkus man NAF lea dahkan. Olles 37 proseantta váhnemiin, geain leat mánát skuvlaagis, oaivvildit dan seamma.
– Lea balddihahtti, oaivvilda NAF gulahallanhoavda, Nils Sødal.
– Ii dárbbaš beare olu dahkkot buoridan dihte luottaid. Lea dehálaš sihkkarastit sihkkelluottaid ja vázzinluottaid, joatká son.
Váhnemat oaivvildit dan seamma
Maiddái váhnemat oaivvildit ahte leat dát buorideamit mat fertejit dahkkojuvvot dahkan dihte skuvlaluottaid eambbo oadjebassan vázzi olbmuide ja sihkkelastiide.
– Mii diehtit ahte mánát eai ipmir ja árvvoštala várálašvuođaid seammaláhkai go ollesolbmot. Danne fertet mii ollesolbmot leat eambbo gozuid alde, lohká Sødal.
Mađi nuorat mánát, dađi eambbo ballet luottain
Iskkus maid NAF lea dahkan, čájeha ahte dušše 20 proseantta sis geain eai leat mánát oaivvildit ahte skuvlaluottat eai leat oadjebasat, 31 proseantta sis geain leat mánát geat orrot ruovttus ja 37 proseantta sis geain leat mánát skuvlaagis oaivvildit dan seamma.
– Mii hásttuhat buot johtaleddjiid doahttalit šilttaid mat čájehit ahte skuvla lea aiddo álgán, ja vuodjit várrogasat skuvllaid lahkosiin, nu ahte nuoramus johtaleaddjit ollejit ruoktot oadjebasat, loahpaha Sødal.
