Biilavuoddji ii dieđihan ahte lea vuodjan bohcco bealleheggii, ja boazodoalli váivašuvvo go dainnalágiin šaddet bohccot gillát.
Beaskáđđasa boazodoallis Piera J. Eiras vuojahalai boazu riikageainnu 93 alde gaskkal Suolovuomi ja Álttá otne birrasiid diibmu 14.00. Eira muitala ledje vihttanat geat oidne go biila vujii bohcco njeaiga, ja oidne maid ahte biila ii bisánan, nu movt mohtorjohtolat lága mielde galgá.
Eai resurssat
Eira muitala vihttanat dieđihedje politiijaide ja dieđihedje maid sutnje, ahte okta vilges gálvobiila lei vuodjan bohcco njeaiga.
– Mun maid válden oktavuođa politiijaiguin ja lohken ahte livčče álki politiijaide bissehit biilla, mii lei manname Guovdageainnu guvlos Áltái, muhto politiijain eai lean resurssat. Dat lea veaháš suhttada go nie álkis áššái eai leat resurssat muhto, buot eará joavdelas áššiide gal leat resurssat, lohká Eira.
Diehtemeahttunvuohta
Eira lohká ii leat buorre diehtit manne biilavuoddji ii bisánan, ja jáhkká dat soaitá danne go vuddjii ii dieđe dan ahte ii dárbbaš buhtadit bohcco ja iige masse dáhkádusfitnodagas bonusa.
– Mun goit ávžžuhivččen vuoddji dieđihit go son ii masse maidege ruđaid.
Váivi go šaddet gillát
Eira muitala lea stuora váttisvuohta ahte biillaide vuojahallet bohccot, ja go dat geat vudjet eai dieđit midjiide eaige politiijaide.
– Dieđusge lea vahát rávis bohcco massit ja maid manahit eanet buhtadusa dan bohcco ovddas go eai dieđit, muhto vearrámus lea go boazu ii mana jámas, ja šaddá gillát vaikko man guhka. Dat boazu ii lean mannan jamas ja šadden easka ieš goddit go ollejin báikái, nu ahte dat lea heitot go šaddet gillat, lohká son.
Váttis go eat dieđe
Oarje-Finnmárkku politiijaguovllu operašuvdnajođiheaddji Sverre Andre Oppdal duođašta sii leat ožžon dieđu vuojahallama birra
– Dađibahábut lea váttis midjiide go eat dieđe makkár biila lea vuodján bohcco njeaiga dahkat nu ollu dainna. Das lea sáhka amas gálvobiilla birra, nu ahte lea váttis dahkat maidege, lohká Oppdal ja son maiddái ávžžuha biilavuoddji dieđihit iežas politiijaide.
