-Almmuhus-
OĐĐASATUnnit ruhta Finnmárkku ovdánahttimii

Unnit ruhta Finnmárkku ovdánahttimii

-

-

Guovlluid ovdánahttindoarjja (RUP) Finnmárkui unniduvvo meastá 14 miljovnnain ruvnnuin stádabušeahtas. 2013 rájes lea ráđđehus unnidan ovdánahttindoarjaga beliin.

Finnmárkku fylkkagielda oažžu 61 miljovnna boahtte jagi, mii lea 13,73 miljovnna unnit go 2016:s. Fylkkasátnejođiheaddji Runar Sjåstad lea beahtahallan ráđđehusa váilevaš vuoruheami dihte go eai heivehala ovdánahttit ealáhusaid Finnmárkkus, čállá Finnmárkku fylkkagielda preassadieđáhusas.

 

Potensiála davvin

– Mii diehtit ahte stuora oassi resurssain, mat buktet dietnasa Norggas, leat davvin. Mis lea ovdánanvejolašvuohta váldoealáhusain, nu go guolásteamis, mearradoalus, energiijas, oljjus ja gássas ja mátkkoštanealáhusas. Mii dovdat man dehálaččat leat doarjagat mat addet ovdánahttinprošeavttaid ja duohtan dahket fitnodagaid ásahemiid, ođđa bargosajiid ja gealboloktema ja innovašuvnna. Čálgostáhta Norga dárbbaša guovlluid gos lea vejolaš buktit riggodagaid, dadjá fylkkasátnejođiheaddji.

 

Stádabušeahtas evttohuvvo 61 miljovnna ruvnno Guovlluid ovdánahttimii boahtte jagi ovddas. 2013:s lei doarjja 128,4 miljovnna ruvnno.

– Dát dramáhtalaš unnideapmi dagaha váttisin Finnmárkku fylkkagildii doaimmahit ovdánahttinrolla boahtteáiggis, dadjá fylkkasátnejođiheaddji.

 

Nuppástuhttindoarjja Mátta-Várjjagii

Sjåstad šálloša go ráđđehus joatká guovlluid ovdánahttindoarjaga unnideami. Juogut fylkkain čájeha maid ahte unnideapmi lea stuorimus guovlluin, erenoamážit davvin.

– Šaddá váikkuhussan sihke fitnodagaide, ealáhussii ja suohkaniidda davvin, dadjá fylkkasátnejođiheaddji. Son lea aŋkke ilus go ráđđehus čuovvola šiehtaduvvon 20 miljovnna ruvnno ruhtadeami Mátta-Várjjat suohkana nuppástuhttimii.

-Almmuhus-