Dál leat boahtigoahtán unnit olbmot UNN:i Romssas korona dihtii.
Leat njeallje beaivvi dan rájes go bođii eambbo go okta ođđa pasieanta beaivválaččat.
Oktiibuot leat ovcci olbmo biddjon UNN:i. Viđas ožžot intensiivadivššu ja golmmas leat respiratoris.
– Lea árrat hállat tendeanssaid birra, muhto mii oaidnit ahte lohku ođđa olbmuin geat biddjojit buohccevissui lea njiedjan maŋimuš beivviid. Daid maŋimuš beivviid leat ožžon ovtta, dahje ii ovttage pasieantta juohke beaivvi, dieđiha buohcceviessudirektevra Anita Schumacher UNN:s.
