Háliidit eanet mánáid oažžut veahki lagasbirrasis.
Mánáid-, nuoraid- ja bearášdirektoráhtta čállá preassadieđáhusas ahte ođđa logut čájehit njiedjama mánáidsuodjalusásahusaid mánáin ja orrunjándoriin 2018:s 2019:i. Dat lea direktevrra Mari Trommald mielas sávahahtti ovdáneapmi.
– Dat lea mihttu ja háliiduvvon ovdáneapmi ahte unnit mánát dárbbašit ásahusfálaldaga ja ahte orrun lea nu oanehaš go vejolaš. Ođđa logut čájehit ahte lea rievttes guvlui ovdáneapmi, dadjá Trommald.
Loahpageahčen 2019 ledje 978 máná ja nuora geat orro mánáidsuodjalusásahusas, ja lea veahá njiedjan ovddit jagis. Seammás leat orrunjándorat unnon measta 17 000 beivviin. Leat maiddái unnon orrunjándorat oktosaš vuolleahkásaččaid fuolahusguovddážiin ja mánáid- ja váhnenguovddážiin.
– Lea suohkaniid ja Bufetat ovddasvástádus fuolahit ahte mánát ožžot nu buori fálaldaga go vejolaš. Logut maid muitalit ahte eanet mánát bohtet jođáneappot ruovttoluotta iežaset árgabeaivái iežaset lagasbirrasii. Lea vuosttažettiin árgabeaivvis ja oassin servodagas gos fertet veahkehit mánáid jus galgat lihkostuvvat. Norggas leat bidjan ollu návccaid ahte nuorat galget fuollaruovttuin, ja ovddemuččat fulkkiid ja fierpmádagaid luhtte, čilge Trommald.
Bufetat doaimmaha iežas ásahusaid ja oastá sajiid priváhta ásahusain. 2019:s ledje golut birrasii 12 000 ruvnno jándoris mánáidsuodjalusásahusas. Priváhta ásahusaid golut leat lassánan 1800 ruvnnuin jándoris 2018 rájes.
