-Almmuhus-
OĐĐASATUnnimusat 200 luonddu- ja birasvárjaleaddji goddon diibmá

Unnimusat 200 luonddu- ja birasvárjaleaddji goddon diibmá

-

-

Unnimus 200 olbmo mat barget luonddu- ja birassuodjalemiin leat goddon máilmmis diibmá, muitala organisašuvdna Global Witness.

Lea alimus lohku maid organisašuvdna lea girjen 2002 rájes, go álge girjet dákkár veahkaváldimiid ja goddimiid.

Oallugat dáin goddon olbmuin ledje aktivisttat geain ledje soahpamušat fitnodagaiguin mat doaimmahit ruvkedoaimmaid, muorračuollamiid ja ovdánahttinriikkaid eanandoalu.

Vearredagut dáhpáhuvve 24 iešguđetlágan riikkas ja eanaš goddimat ledje Latiidna-Amerihkás. Indias lea dákkár dáhpáhusain leamaš stuora lassáneapmi diimmáža rájes.

 

Goddet álgoálbmogii

40 proseantta dain goddon olbmuin gulle iešguđetlágan álgoálbmogiidda. Billy Kyte, gii bargá Global Witness ovddas, muitala ahte olu ruvke-, oljo-, eanadoallo- ja muorračuollanfitnodagat leat viiddidan iežaset doaimmaid ja dávjá de šaddet soahpameahttunvuođat álgoálbmogiiguin.

 

Brasilas vearrámus dilli

Lea váttis gávdnat dieđuid dakkár olmmošgoddimiid birra, ja Global Witness ballá dáid loguid leat duohtavuođas olu stuorábut. Hui olu aktivisttat ja luonddu-ja birasvárjaleaddjit, mat eai leat vásihan veahkaválddašvuođa, lohket goitge iežaset áitojuvvon ja eará láhkái vealáhuvvon.

49 luonddu- ja birasvárjaleaddji ja aktivisttat leat goddon Brasilas, ja dát lea stuorámus lohkku buot daid riikkain mat leat listtus. Indias fas leat 16:s goddon, ja leat leamašan olu dáhpáhusat main politiijat leat veahkaválddálaččat áimmahuššan ráfálaš miellačájeheddjiid. Afrihkás fas vásihit luonddufávttat dávjá veahkaválddálašvuođa suollemasbivdiin. (©NTB)

-Almmuhus-