-Almmuhus-
SMÁVVAOĐĐASATUnnidedje plastihkka­geavaheami 268 tonnain

Unnidedje plastihkka­geavaheami 268 tonnain

-

-

Coop gávpevuođđudus dieđiha ahte leat unnidan plastihkkageavaheami sakka diibmá maŋŋel go leat ásahan ođđa doaibmabijuid. Earret eará leat molson murjjiin plastihkkadovnnjiid, ja dainna unnidedje plastihkkageavaheami 77 tonnain. Dat dagahii maiddái ahte muorjjit riibet guhkit ja dalle bálkkestuvvo unnit biebmu. 

Oktiibuot leat Norgga ealáhusdoaimmat unnidan plastihkkageavaheami 1000 tonnain 2021:s. Nu čájehit Grønt Punkt «Plastløfte» logut maidda ealáhusat leat searvan eaktodáhtolaččat. Ulbmilin lea ahte ealáhusfitnodagat unnidit plastihkkageavaheami ja geavahišgohtet eanet plastihka man lea vejolaš ođđasit geavahit.

Coop unnidii plastihkkageavaheami 268 tonnain diibmá, ja dat lea njealjádasoassi ealáhusaid plastihkkageavaheamis. Gávpevuođđudus lea čađahan iešguđetge doaibmabijuid plastihkkaunnideami oktavuođas. 

– Diibmá molssuimet earret eará murjjiid plastihkkadovnnjiid ja dan olis leat geavahan 77 tonna unnit plastihka. Dál páhkket murjjiid báberdovnnjiide maid gokčat plastihkkabihtáin. Dál riibet muorjjit buorebut ja danin bálkestuvvo unnit biebmu, go murjjiid páhkket báberdovnnjiide maid gokčat plastihkain, lohká Coop Norgga Trygg vare kvalitehtahoavda Sylvia Lofthus. 

Nammaduvvon bálkkašupmái

Ihttin, njukčamánu 22. beaivvi, juohká Grønt Punkt ja Matvett bálkkašumiid fitnodagaide mat leamaš mielde unnideamen plastihkkageavaheami diibmá. Oktiibuot serve 58 fitnodaga ja jury lea árvalan 12 fitnodaga njealji iešguđetge bálkkašupmái. 

Coop lea nammaduvvon vuoitit riibanbálkkašumi. 

– Lean hui ilus ja rámis go Coop lea nammaduvvon justa dán bálkkašumi vuoitit. Mii han bargat garrasit buoredit dovnnjiid ja seammás unnidit plastihkkageavaheami. Maŋimuš jagi leat bidjan olu návccaid dasa ja daid dovnnjiid dihte lea riibanáigi buorránan. Lea hirbmat somá go dán dihte oažžut fuomášumi, lohká Lofthus preassadieđáhusas. 

-Almmuhus-