Olusat leat šaddadišgoahtán ruotnasiid ja háliidit maid vuovdit daid. Davvin sáhtášii dat lasihit báikkálaš šaddaduvvon ruotnasiid.
Makkár vejolašvuođat gávdnojit Davvi-Norggas šaddadit veaháš ruotnasiid vuovdimassii ja makkár márkanastinhástalusaid vásihit ruonasšaddadeaddjit Davvi-Norggas? Mii gáibiduvvo vai sáhtášii lihkostuvvat ja mo sáhtášedje hálddahus ja doarjjaásahusat veahkehit dán smávva ruonasealahusa buorebut? Dan jearrá Romssa ja Finnmárkku stáhtahálddašeaddji preassadieđáhusas.
– NIBIO lea dutkan smávva ruonasbuvttadeaddjiid Romssas ja Finnmárkkus geat vuvdet báikkálaččat ja muitalat maid dát buvttadeaddjit leat vástidan, lohká stáhtahálddašeaddji.
Lea sáhka dutkamušas «Markedsmessige muligheter og utfordringer for småskala grønnsaksproduksjon for salg i Troms og Finnmark» (Márkanastinvejolašvuođat ja -hástalusat smávva ruonasšaddobuvttadeamis vuovdima váras Romssas ja Finnmárkkus). Norgga bioekonomiija instituhtta (NIBIO) lea ovttasráđiid Romssa ja Finnmárkku stáhtahálddašeaddjiin čađahan dan ja Romssa ja Finnmárkku fylkkagieldda lea ruhtadan dan Arktis 2030 bokte.
Ovttasbargoguimmežagat leat Lokalmat i Troms og Finnmark, Innovasjon Norge Arktisk, Fylkagielda, Stáhtahálddašeaddji, Sámediggi ja Báikkálaš borramuš gelbbolašvuođafierpmádat. Áigemearri searvat lea miessemánu 24. beaivvi.
