Ođđa logut čájehit ahte unnán olbmot šaddet buohccivissui omikron-variánttain jus buohtastáhttá koronavirusa delta-variánttain mii lei ovdalaš juovllaid ja juovllaid.
Moatti vahku geahčen jáhkket eiseválddit ahte galgá dán dálvvi eanemus njoammun korona dáfus. Ođđa logut čájehit ahte hui unnán olbmot buohccájit nu bahuid ahte šaddet buohccivissui korona njoammudávdda omikron-variánttain, jus buohtastahttá delta-variánttain mii lei loahpas 2021.
Álbmotdearvvašvuođainstituhta (FHI) logut čájehit ahte go 2021:s 40. vahku duođaštuvvojedje 3000 njoammuma Norggas, de ledje 41. vahku 62 olbmo buohccivissui šaddan dan geažil. Dat lea 2 proseantta sis geat ožžo korona.
Dán jagi goalmmát vahku ledje 120 000 olbmo ožžon korona. Namalassii omikron-variántta, de ledje vahku maŋŋel 220 olbmo geat šadde buohccivissui dan geažil. Dat mielddisbuktá ahte 0,2 proseantta sis geat ožžo korona buohccájedje nu bahuid dainna ahte šadde buohccivissui.
