1000 ođđa borasdávdadáhpáhusa čadnojit jahkásaččat alkoholii. Liikká dihtet unnán olbmot ahte alkohola stuorida vejolašvuođa oažžut borasdávddá, čájeha Ipsos ođđa iskkadeapmi.
– Eatnašat dihtet ahte duhpát ja badjelmeare áfáiduhttin lasiha borasdávdavára. Nu ii berre leat, dadjá Ingrid Stenstadvold Ross, Borasdávdasearvvi generálačálli.
Juohke jagi sáhttet badjel 400 čoalleborasdávdda ja badjel 200 čižžeborasdávdda čadnot alkoholageavaheapmái. Mađi eambbo alkohola juhká, dađi stuorat várra oažžut borasdávdda. Seammás lea nu ahte juohke čihččet borasdávdadáhpáhusa, mas lea oktavuohta alkoholii, čadno moderáhta alkoholajuhkamii.
– Mii eat háliit ahte olbmot galget heaitit alkohola juhkamis. Dat maid mii háliidat lea ahte nu olusat go vejolaš galget diehtit ahte alkohola lasiha vára oažžut borasdávdda. Danin eat daja heaitte áibbas, muhto mudde veaháš, dadjá Av-og-til generálačálli Ragnhild Kaski.
