-Almmuhus-
VALÁŠTALLANUnnán nissonat servet OF 700 luohkkái

Unnán nissonat servet OF 700 luohkkái

-

-

Dán jagáš OffroadFinnmark 700 kilomehtera vuoddjit duolmmastedje johtui Álttás diibmu 12. Dušše guokte seaguhuvvon joavkku (mixlag) ledje vuolggasárgás, muhto ii oktage nissonjoavku.

Dušše guokte joavkku ledje almmuhan mielde dán jagáš seaguhuvvon joavkkuid (mixlag) 700 kilomehtera luohkái, mas leat mielde okta nisu goappátge joavkkus, muhto ii oktage nissonjoavku.

Váttis oažžut mielde
OffroadFinnmark beaivválaš jođiheaddji Jorund Greibrokk dadjá váttis oažžut nissoniid searvat guhkesmátkki luohkkái ja lohká sin geahččalit loktet beroštumi dasa.

– Lea váttis gávdnat nissoniid geat liikojit dán valáštallama ja leat eanáš albmát geat leat mielde. Ii leat dábálaš ahte nissonat duolmmastit 700 kilomehtera guhkes mátkái hástaleaddji máđiis, gos luotta manná vulos bajás čađat, čilge son.

Son muitala ahte lea dušše okta nisu árat gii lea čađahan OF 700 mátkki, Gerit Pfuhl ja son lea mielde Team Arzgebirg joavkkus dán jagi. Son lea duiskalaš ja máilmmimeašttir. Nuppi joavkku Team Rye XP, šaddá Linda Treseng vuosttáš norgalaš gii lea čađahan OF, jus son nagoda čađahit olles gilvvu.

Buorre siivu
Beal guovtti sulaid galge joavkku ollet vuosttaš vuoiŋŋastanbáikái Álttá guovddážis ja beaivválaš jođiheaddji lohká vuodjin siivvu leat hui buorre.

– Sii bisánit dás ovdal go vulget dan guhkes mátkái duoddariid badjel. Dáppe ožžot veahá šattuid ja juhkat. Máđii lea goikkis ja  vuoddjit galget gierdat veahá arvvi. Lea arvvestan veahá maŋimuš beivviid ja dat lea buorre. Ja orro čájeheamen ahte gaskavahkku boahtá arvit veahá, muhto loahpa vahkku orro buorre dálki, muitala son.

Čuoikadálki
Beaivválaš jođiheaddji dadjá sihkkelasttiide buoret go lea veahá čoaskkis, ovdal go beaivi mii goardá.

– Dalle gilvaleaddjit eai dárbbaš juhkat nu ollu jus ii leat báhka. Ja sáhttá šaddat hástaleaddjin jus lieggaceahkit badjánit beare hága. Dál lea dálki go čuoiká loaktá ja sáhttá maid buktit veahá hástalusaid, jus gilvaleaddjit bártidit. Muhto nu guhká go leat jođus, de gal eai dárbbaš bálgat dain, čaimmiha son.

13 joavkku
Maŋŋebárgga eahkeda vulge maiddái almmáiolbmo 700 kilomehtera luohkká joavkkut johtui diibmu 18 ja vuolggasárgás ledje 13 joavkku.
Vuosttaš guhkesmátkki sihkkelastit vurdojuvvojit mollii bearjadaga birrasii diibmu guovttis Álttá guovddážis.
OF 300 luohkká vuoddjit duolmmastit mátkái duorastaga diibmu 18:s ja vurdojuvvojit mollii bearjadat eahketbeaivvi rájes.

-Almmuhus-