Finnmárkkus riegádedje diibmá 615 máná, dat lea 28 unnit go 2019:s.
Vaikko 2019:s lassánedje riegádeamit, de lea treanda ahte logut njidjet jagis jahkái, ja ođđasit áiggis ii leat ovdal dáhpáhuvvan ahte nu unnán mánát riegádedje Finnmárkkus go diibmá.
Hámmerfeasttas riegádedje 349 máná, mii lea eanemus Finnmárkkus, muhto 31 unnit go 2019:s. Álttás lassánedje čiežain ja diibmá riegádedje ge 75 máná doppe. Girkonjárggas lea lohku unnon njeljiin ja doppe riegádedje 191 máná.
Nationála treanda
Eanas guovlluin Norggas lea riegádanlohku njiedjan ja sivvan dasa lea go olbmot vurdet guhkit ovdal go ožžot mánáid, dasa lassin go juohke nissonolmmoš ii oaččo seamma máŋga máná go ovdal ožžo.
– Mii čuovvut nationála treandda dáppe davvin maid, eatge oaččo nu ollu mánáid go ovdal. Nissonolbmot leat maid dál boarráseappot go ovdal lávejedje, ovdal go ožžot mánáid, dadjá Álttá riegádahttinlanja ovttadatjođiheaddji, Gunn Olsen preassadieđáhusas.
