Norggas demeansadikšu lea huksejuvvon vuorrasat olbmuid várás. Nuorat olbmot demeanssain dárbbašit eará veahkkefálaldaga ja lahkonanvuogi mii heive sin agi ektui, dadjá doavttir ja Levanger buohcceviesu stipendiáhtta Marte Kvello-Alme VG:i.
Kvello- Alme lea njeallje jagi jođihan dutkama mii guorahallá demeansadávdda olbmuin geat fáhtehallet dávdii ovdal go devdet 65 jagi.
Dát lea vuosttaš geardde go dakkár dutkan dahkko Skandinávias, ja dál leat bohtosat UngDemensstudien nammasaš dutkamis almmuhuvvon Journal og Alzhzeimer`s disease áigečállosis.
Ođđa láhka nanne rivttiid
Olbmot demeanssain galget oažžut seamma buori fálaladaga beroškeahttá gos riikkas orrot, dadjá Norgga boarrásiid- ja álbmotdearvvašvuođaministtar Sylvi Listhaug Vg:i.
– Ođđajagemánu 1. beaivvi rájes boahtte jagi lea gielddain lága bokte geatnegasvuohta fállat beaivedoaimmaid olbmuide geain lea demeansa ja geat ain orrot ruovttus, muitala Listhaug.
