-Almmuhus-
KULTUVRA– Unnán hutkáivuohta jus suoládit dan

– Unnán hutkáivuohta jus suoládit dan

-

-

Kárášjoga festiválaid beaivválaš jođiheaddji Kenneth Eliassen lohká iežaset árvvoštallamin doallat «GolleJietna» gilvvuid Rosie Holmestrand haga. Holmestrand gohčoda dán suoládeapmin.

 – Mii leat dál gulaskuddamin earáiguin geat sáhtašedje lágidit dáid gilvvuid, muitala Eliassen.

 

Árvvoštallet geavahit nama

Ikte čálii Ávvir ahte Jergul Eventa Rosie Holmestrand ii áiggo lágidit «GolleJietna» gilvvuid dáid beassážiid, vaikke Kárášjoga Festiválat leat ge almmuhan doaluid iežaset gaskaboddosaš prográmmas ja neahttasiiddus. Dál čilge festivála beaivválaš jođiheaddji Kenneth Eliassen manne dát doalut ain leat almmuhuvvon sin neahttasiiddus.

 – Min ulbmil lea bisuhit seamma olu doaimmaid ja doaluid go diimmá beassášfestiválas ledje. Danne háliidat lágidit gilvvu skilleduorastaga ja danne leat maid almmuhan dáid doaluid vaikke dat eai lean duođaštuvvon, čilge son.

 

 – Áigubehtet go geavahit «GolleJietna» nama dáid gilvvuide?

 

 – Mii leat árvvoštallamin dan, mun in dieđe leat go dien nammii čatnasan makkárge geavahanrievttit. Dan ferten gulaskuddat earáiguin geain lea gelbbolašvuohta dákkár áššiide, vástida son.

 

­– Lea bat namma dehálaš?

Eliassen dattege dadjá Ávvirii ahte ii ádde manne dan nama birra jerro.

 – Lea bat nu dehálaš mii dat lea namaid dan gilvvus, dadjá son.

 

– Suoládit earáid buktaga

Jergul Eventa Rosie Holmestrand gal healkkiha go gullá Kárášjoga Festivála árvvoštallamin lágidit «GolleJietna» gilvvuid.

 – Jus Kenneth Eliassenis ja Kárášjoga festiválain ii leat eanet hutkáivuohta go eará fitnodagaid konseaptaid suoládit de gal mun in šat dieđe makkár jođiheapmi dien festiválas lea, beaškala Holmestrand ja deattuha ahte «GolleJietna» ii leat goassege gullan festivála vuollái, muhto lea ollásit Jergul Eventa lágideapmi.

 

Áigu ohcat pateanta

Holmestrand muitala iežas maŋŋebárgga aitto háleštan Pateantakantuvrrain, ja gulaskuddan olu máksá patenteret dáid gilvvuid ja vuoitobácci hámi.

 – Dalle gal jurddašin ahte orui measta menddo divrras, in ge áigon sáddet pateantaohcamuša. Muhto go gulan Eliassena ságaid de gal áiggun sáddet ohcamuša dakkaviđe.

 

 

 

 

 

 

 

 

 

 

-Almmuhus-