Guhtta olbmo leat heavvanan suoidnemánus. Norsk Folkehjelp ii leat goassige registreren ná unnán heavvanemiid geasi áigge.
Guhtta olbmo leat heavvanan suoidnemánus. Norsk Folkehjelp ii leat goassige registreren ná unnán heavvanemiid geasi áigge.
Norsk Folkehjelp lea 1988 rájes čálihan statistihkaid.
Ovddeš logut čájehit ahte leat gaskamearálaččat guoktelogi olbmo mat heavvanit Norggas suoidnemánus.
Geassemánus leat ges leamaš guhtta heavvaneami ja lea maiddái vuollel dan gaskamearálašlogu mii lea golbmanuppelogi heavvaneami.
– Leat ilolaš logut ja lea ovdáneapmi man mii sávvat bistit, dadjá Jon Halvorsen guhte lea ovttadatjođiheaddji gádjundoaimmas ja vuosttaš heahteveahkis Norsk Folkehjelpas.
Gahččet gáttis čáhcái
Buohkat sii geat dušše heavvaneamis suoidnemánus ledje almmáiolbmot.
Statistihkka dán jagi čájeha ahte sivva badjel beali heavvanemiide Norggas, lea ahte olbmot leat gahččan gáttis čáhcái – seamma sivva lei diibmá ge.
– Leat ollugat mat návddašit geassebeivviid sihke čázi lahka ja alde. Statistihkka čájeha ahte eanaš heavvaneamit gevvet go gahččá gáttis čáhcái. Mii sávvat ahte eatnasat geavahit gádjunliiva maiddái go leat káija dahje brugga alde, ii ge dušše go leat fatnasis, dadjá Jon Halvorsen.
– Mii ávžžuhit olbmuid geat johtet meara dahje joga lahka leat várrugassan, erenomážit jus leat okto. Dalle ii leat okta ge gii dieđiha jus lihkohisvuohta dáhpáhuvvá, lohká Halvorsen.
Hordaland fylkkas eanemus heavvaneamit
Guđas leat heavvanan Hordalandas, ja Hordaland fylkkas dat leat eanemus heavvaneamit dán jagi.
