Unjárggas ávvudit Sámi álbmotbeaivvi Várjjat Sámi museas. Prográmmas leat sámi báikenamat ja filbma, ja bosihanbottus besset buohkat geahččalit njoarostit olgun.
Unjárgga Sámiid Searvi ja ovccát luohkká ja vánhemat lágidit Sámi álbmotbeaivvi. Doalut álget tiibmu 14.00 Várjjat sámi museas. Dalá maŋŋá go Sámi álbmotlávlla lea lávlojuvvon, de doallá sámediggeáirras ja Norgga Sámiid Riikkasearvvi jođiheaddji Beaska Niillas beaivvi sártni.
Dán jagi lea Sámi álbmotbeaivvi fáddá «Sámegiel báikenamat ja čujuhusat». Prošeaktajođiheaddji Yngve Johansen muitala Unjárgga sámegiel báikenamaid valljivuođa birra ja das maŋŋá joatká báikkálaš historihkkár Øystein Nilsen fáttá go buohtastahttá mo báikenammaláhka ja matrihkkelláhka soabadit go lea sáhka «Báikenamat njálmmálaš geavaheamis, galbbat ja ođđa čujuhusaide». Tiibmu golmmas lea digaštallan ja das maŋŋá lea tiibmobeale njoarosteapmi olgun. Maŋimuš kvártta ovdal njealji čájehuvvo Unjárgga vuosttaščájálmas oanehisfilmmas «Bihttoš» man Elle Máijá Tailfeatherss ovttasráđiid Violator Films lea buvttadan.
