Vaikke Globenis ii lean biškkaš maŋŋil go Agnete lei lávlon, de Unjárggas gal biškugohte ovdal go lávddi ala ge lávkii.
Trattoria Capri kafejai, Unjárggas, leat sihke mánát, nuorat ja rávisolbmot čoahkkanan stuorrašearpmas geahččat Eurovision-gilvvuid.
Sii leat gealdagasas vuorddašeamen oaidnit iežaset nieidda lávddi alde.
– Deike bohtet dađistaga eanet olbmot. Olbmot leat buorre mielas ja gealdagasas. Muhtin bearrašat leat maid boahtán deike. Olbmot návddašit eahkeda njálgga biepmuin ja juhkamušain, muitala Nina Margit, guhte lea Trattoria Capris dál.
– Váibmu julká
Unjárggas olbmot álget dál ráhkkanit dassážii go Norga lávlu, dál ii leat go Danmárku ja Ukraina vel ovdal go Agnete lávke lávddi ala.
– Olbmot dovdojit vel eanet gealdagasas go eske. Dál gal dovdo váibmu julkimin, muitala Nina Margit.
Govven: Nina Margit
Biškkas
Juste ovdalaš go Agnete lávkii lávdái, de lei Unjárggas oalle biškkas.
Doppe dovdo ain doaivva ahte unjárnieida sáhttá olahit finálii.
– Muhtima dáppe gal čielgasit oaivvildit su jo beassan finálii, muitala Margit.
Šearbma čáhpodii
Maŋŋil go buot artisttat ledje lávlon, ja juste ovdal go Agnete lávlla galggai ođđasit čájehuvvot, de čáhpodii stuorrašearbma Trattoria Capri kafejas.
– Dál eat oainne maidege, muhto jietna gal doaibmá ain, muitala Nina Margit, guhte lea kafejas.
Sii datte eai leat gal ráđeheamet:
– Mii sirddiimet astoáigeklubba vistái mii lea kafeja balddas, Klubbajođiheaddji Per Inge Olsen lei maid Capris, ja jođánit ordnestii midjiide TV klubbavisttis, čaibmá Margit. Doppe jotket geahččat oassefinála.
Beahtahallan
Maŋŋil go čielggai ahte Agnete ii leat okta dan logi artistta searvvis geat besse viidásat Eurovision finálii, de Unjárggas nogai suohtas.
– Mii leat beahtahallan. Hirpmahuvvan, lohká Nina Margit álggos, ja vuhtto hálaheapmin.
Go de lea veaháš smiehtastan de joatká:
– Agnete lei čielgasit galgat beassat viidáseappot finálii. Muhto son dagai buori barggu ja mii leat ain su fánssat, lohká son ja deattuha ahte Agnete ii eisege beahttán sin odne.
